@5 cha.Ma.,i. santike 6 cha.Ma. āraññako. evamuparipi 7 cha.Ma.,i. ācikkhitvā Bhante"ti vadante pabbājeti. Te attano balena taṃ taṃ dhutaṅgaṃ adhiṭṭhahanti. Theropi attano dasavassikakāle vinayaṃ paguṇaṃ katvā sabbeva upasampādesi. Evaṃ upasampannāvassa pañcasatamattā bhikkhū parivārā ahesuṃ.

Tasmiṃ samaye satthā jetavanamahāvihāre vasanto "icchāmahaṃ bhikkhave aḍḍhamāsaṃ paṭisallīyitun"ti bhikkhusaṃghassa ārocetvā ekavihārī hoti. Bhikkhusaṃghopi "yo bhagavantaṃ dassanāya upasaṅkamati, so pācittiyaṃ desāpetabbo"ti katikaṃ akāsi. Tadā upasenatthero "bhagavantaṃ passissāmī"ti attano parisāya saddhiṃ jetavanaṃ gantvā satthāraṃ upasaṅkamitvā abhivādetvā ekamantaṃ nisīdi. Satthā kathāsamuṭṭhāpanatthaṃ aññataraṃ therassa saddhivihārikaṃ āmantesi "manāpāni te bhikkhu paṃsukūlānī"ti. "na kho me bhante manāpāni paṃsukūlānī"ti vatvā satthu upajjhāyagāravena paṃsukūlikabhāvaṃ ārocesi. Imasmiṃ ṭhāne satthā "sādhu sādhu upasenā"ti therassa sādhukāraṃ datvā anekapariyāyena guṇakathaṃ kathesi. Ayamettha saṅkhepo, vitthārato pana idaṃ vatthu pāliyaṃ āgatameva. Atha satthā aparabhāge ariyagaṇamajjhe nisinno imasmiṃ sāsane theraṃ samantapāsādikānaṃ aggaṭṭhāne ṭhapesīti.

Dabbattheravatthu

[214] Chaṭṭhe senāsanapaññāpakānanti senāsanaṃ paññāpentānaṃ. Therassa kira senāsanapaññāpakakāle aṭṭhārasasu mahāvihāresu asammaṭṭhapariveṇaṃ vā appaṭijaggitaṃ senāsanaṃ vā asodhitaṃ mañcapīṭhaṃ vā anupaṭṭhitaṃ pānīyaparibhojanīyaṃ vā nāhosi. Tasmā senāsanapaññāpakānaṃ aggo nāma jāto. Dabboti tassa nāmaṃ. Mallarājakule pana uppannattā mallaputto nāma jāto.