@8 cha.Ma.,i. takkasilanagare Rājagehe nibbatto, eko pabbateyyaraṭṭhe paribbājikāya kucchismiṃ nibbatto, eko bāhiyaraṭṭhe kuṭumbikassa gehe nibbatto, eko rājagahe nibbatto. Ayaṃ pana dabbatthero mallaraṭṭhe anupiyanagare ekassa mallarañño gehe paṭisandhiṃ gaṇhi. Tassa mātā upavijāya kālamakāsi, matasarīraṃ susānaṃ netvā dārucitakaṃ āropetvā aggiṃ adaṃsu. Tassā aggito santattaṃ udarapaṭalaṃ dvedhā ahosi. Dārako attano puññabalena uppatitvā ekasmiṃ dabbathambhe nipati. Taṃ dārakaṃ gahetvā ayyikāya adaṃsu. Sā tassa nāmaṃ gaṇhantī dabbathambhe patitvā laddhajīvitattā dabbotissa nāmaṃ akāsi.

Tassa vassikakāle satthā bhikkhusaṃghaparivāro mallaraṭṭhe cārikañcaramāno anupiyanigamaṃ patvā anupiyavane viharati. Dabbakumāro satthāraṃ disvā buddhasāsaneyeva pasīditvā pabbajitukāmo hutvā "ahaṃ dasabalassa santike pabbajissāmī"ti ayyikaṃ āpucchi. Sā "sādhu tātā"ti dabbakumāraṃ ādāya satthu santikaṃ gantvā "bhante imaṃ kumāraṃ pabbājethā"ti āha. Satthā aññatarassa bhikkhuno saññamadāsi "bhikkhu imaṃ dārakaṃ pabbājehī"ti. So thero satthu vacanaṃ sutvā dabbakumāraṃ pabbājento tacapañcakakammaṭṭhānaṃ ācikkhi. Pubbahetusampanno katābhinīhāro satto paṭhamakesavaṭṭioropanakkhaṇe sotāpattiphale patiṭṭhahi, dutiyakesavaṭṭiyā oropiyamānāya sakidāgāmiphale, tatiyāya anāgāmiphale. Sabbakesānaṃ pana oropanañca arahattaphalasacchikiriyā ca apacchā apure ahosi.

Satthā mallaraṭṭhe yathābhirantaṃ viharitvā rājagahaṃ gantvā veḷuvane vāsaṃ kappesi. Tatrāyasmā dabbo mallaputto rahogato attano kiccanipphattiṃ oloketvā saṃghassa veyyāvaccakaraṇe kāyaṃ yojetukāmo cintesi "yannūnāhaṃ saṃghassa senāsanañca