@3 Sī.,cha.Ma. upavijaññakāle 4 cha.Ma. aggivegasantattaṃ 5 cha.Ma. dabbatthambhe

@nipatitvā 6 cha.Ma. sattavassikakāle 7 cha.Ma. anupiyambavane 8 cha.Ma.,i. dassaneneva

@9 cha.Ma. paṭhamakesavaṭṭiyā oropiyamānāya 10 cha.Ma. patiṭṭhāsi Paññāpeyyaṃ, bhattāni ca uddiseyyan"ti. So satthu santikaṃ gantvā attano parivitakkaṃ ārocesi. Satthā tassa sādhukāraṃ datvā senāsanapaññāpakatañca bhattuddesakatañca sampaṭicchi. Atha naṃ "ayaṃ dabbo daharova samāno mahante ṭhāne ṭhito"ti sattavassikakāleyeva upasampādesi. Thero upasampannakālatoyeva paṭṭhāya rājagahaṃ upanissāya viharantānaṃ sabbabhikkhūnaṃ senāsanāni ca paññāpeti, bhikkhañca sampaṭicchitvā uddisati. Tassa senāsanapaññāpakabhāvo sabbadisāsu pākaṭo ahosi. "dabbo kira mallaputto sabhāgasabhāgānaṃ bhikkhūnaṃ ekekaṭṭhāne senāsanāni paññāpeti, dūrepi senāsanaṃ paññāpetiyeva. Gantuṃ asakkonte iddhiyā netī"ti.

Atha naṃ bhikkhū vikālepi "amhākaṃ āvuso jīvakambavane senāsanaṃ paññāpehi, amhākaṃ maddakucchismiṃ migadāye"ti evaṃ senāsanaṃ uddisāpetvā tassa iddhiṃ passantā gacchanti. Sopi iddhiyā manomayena kāyena abhisaṅkharitvā ekekassa therassa ekekaṃ attanā sadisaṃ bhikkhuṃ nimminitvā aṅguliyā jalamānāya purato gantvā "ayaṃ mañco idaṃ pīṭhan"tiādīni vatvā senāsanaṃ paññāpetvā puna attano vasanaṭṭhānameva āgacchati. Ayamettha saṅkhepo, vitthārato panidaṃ vatthuṃ pāliyaṃ āgatameva. Satthā idameva kāraṇaṃ atthuppattiṃ katvā aparabhāge ariyagaṇamajjhe nisinno theraṃ senāsanapaññāpakānaṃ aggaṭṭhāne ṭhapesīti.