yāya nābhisaje kañci tamahaṃ brūmi brāhmaṇan"ti.

@4 cha.Ma. pharusavacanā 5 cha.Ma. iccesa bhavāciṇṇeneva kathesi 6 khu.dha. 25/408/88

Athekadivasaṃ thero rājagahaṃ piṇḍāya pavisanto ekaṃ purisaṃ pipphalīnaṃ pātiṃ pūretvā ādāya antonagaraṃ pavisantaṃ disvā "kiṃ te vasala bhājane"ti āha. So cintesi "ayaṃ hi samaṇo mayā saddhiṃ pātova pharusakathaṃ katheti, imassa anucchavikameva vattuṃ vaṭṭatī"ti "mūsikavaccaṃ me bhante bhājane"ti āha. Evaṃ bhavissati vasalāti. Tassa therassa dassanaṃ vijahantassa sabbaṃ mūsikavaccameva ahosi. So cintesi "imā pipphaliyo mūsikavaccasadisā paññāyanti, sabhāvo nu kho no"ti vīmaṃsanto hatthena uppīḷesi. Athassa undūravaccabhāvaṃ ñatvā balavadomanassaṃ uppajji. So "imāyeva nu kho evarūpā, udāhu sakaṭepī"ti gantvā olokento sabbāpi pipphaliyo tādisāva disvā hadayaṃ hatthena sandhāretvā "idaṃ na aññassa kammaṃ, mayā pātova diṭṭhabhikkhussetaṃ kammaṃ, addhā ekaṃ māyaṃ bhavissati, tassa gataṭṭhānaṃ anuvijjitvā ekaṃ kāraṇaṃ jānissāmī"ti therassa gatamaggaṃ pucchitvā pāyāsi.