Atheko puriso taṃ ativiya caṇḍitaṃ gacchantaṃ disvā "bho purisa ativiya caṇḍito gacchasi, kena kammena gacchasī"ti pucchi. So tassa taṃ pavuttiṃ ārocesi. So tassa taṃ kathaṃ sutvā evamāha "bho mā cintayi, mayhaṃ ayyo pilindavaccho bhavissati, tvaṃ etadeva bhājanaṃ pūretvā ādāya gantvā therassa purato tiṭṭha. `kiṃ Nāmetaṃ vasalā'ti vuttakālepi `pipphaliyo bhante'ti vada, thero `evaṃ bhavissati vasalā'ti vakkhati. Puna sabbā pipphaliyo bhavissantī"ti. So tathā akāsi. Sabbā pipphaliyo paṭipākatikā ahesuṃ. Idaṃ ettakaṃ vatthuṃ. Aparabhāge pana satthā devatānaṃ piyamanāpakaraṇameva vatthuṃ katvā theraṃ devatānaṃ piyamanāpānaṃ aggaṭṭhāne ṭhapesīti.

Bāhiyadārucīriyattheravatthu

[216] Aṭṭhame khippābhiññānanti khippaṃadhigatābhiññānaṃ dārucīriyatthero aggoti dasseti. Ayañhi thero saṅkhittadhammadesanāpariyosāne arahattaṃ pāpuṇi,