@3 Sī.,i. caṇḍigataṃ, cha.Ma. caṇḍikataṃ Maggaphalānaṃ parikammakiccaṃ nāhosi. Tasmā khippābhiññānaṃ aggo nāma jāto. Bāhiyaraṭṭhe pana jātattā bāhiyotissa nāmaṃ akaṃsu. So aparabhāge dārucīrāni nivāsesi, tasmā dārucīriyo nāma jāto.

Tassa pañhākamme ayamanupubbikathā:- ayaṃpi hi padumuttarabuddhakāle haṃsavatīnagare kulagehe nibbatto dasabalassa dhammaṃ suṇanto satthāraṃ ekaṃ bhikkhuṃ khippābhiññānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhetvā yāvajīvaṃ kusalaṃ kammaṃ katvā devamanussesu saṃsaranto kassapadasabalassa sāsane osakkanakāle heṭṭhā vuttehi bhikkhūhi saddhiṃ samaṇadhammaṃ katvā paripuṇṇasīlo jīvitakkhayaṃ patvā devaloke nibbatti.

So ekaṃ buddhantaraṃ devaloke vasitvā imasmiṃ buddhuppāde bāhiyaraṭṭhe kulagehe nibbatto. Vayaṃ āgamma gharāvāsaṃ vasanto "vohāraṃ karissāmī"ti suvaṇṇabhūmigamanīyaṃ nāvaṃ abhiruhi. Nāvā icchitadesaṃ appatvāva samuddassa majjhe bhinnā, mahājano macchakacchapabhakkho ahosi. Ayaṃ pana ekaṃ dārukhaṇḍaṃ gahetvā sattame divase suppārakapaṭṭane uttiṇṇo manussavāsabhāvaṃ ñatvā "acelakaniyāmena manusse upasaṅkamituṃ ayuttan"ti avidūre ṭhāne ekasmiṃ taḷāke sevālaṃ gahetvā sarīraṃ veṭhetvā ekasmiṃ devaṭṭhāne patitaṃ ekaṃ kapālaṃ ādāya bhikkhāya pāvisi.

Manussā taṃ disvā cintesuṃ "sace loke arahanto nāma atthi, evaṃvidhehi bhavitabbaṃ. Kiṃ nu kho ayyo ukkaṭṭhabhāvena vatthaṃ na gaṇhāti, udāhu dīyamānaṃ gaṇheyyā"ti vīmaṃsantā nānādisāhi vatthāni adaṃsu. So cintesi "sacāhaṃ na iminā niyāmena āgamissaṃ, na me ete pasīdeyyuṃ, yaṅkiñci vatvā ime vañcetvā jīvitupāyaṃ kātuṃ vaṭṭatī"ti vatthāni na paṭiggaṇhi. Manussā bhiyyoso mattāya