Dārucīriyopi mahābrahmunā saṃvejito "mokkhamaggaṃ gavesissāmī"ti vīsatiyojanasataṃ maggaṃ ekarattivāsena gantvā satthāraṃ piṇḍāya paviṭṭhaṃ antaraghare sampāpuṇitvā satthu pādesu nipatitvā "desetu me bhante bhagavā dhammaṃ, desetu sugato dhamman"ti yāvatatiyaṃ yāci. Satthā "ettāvatā bāhiyassa ñāṇaṃ paripākaṃ gatan"ti ñatvā "tasmātiha te bāhiya evaṃ sikkhitabbaṃ diṭṭhe diṭṭhamattaṃ bhavissatī"ti iminā ovādena ovadi. Sopi desanāpariyosāne antaravīthiyaṃ ṭhitova desanānusārena ñāṇaṃ pesetvā saha paṭisambhidāhi arahattaṃ pāpuṇi.

So attano kiccamatthakaṃ patvā bhagavantaṃ pabbajjaṃ yācitvā aparipuṇṇapattacīvaratāya pattacīvaraṃ pariyesanto saṅkāraṭṭhānato coḷakkhaṇḍāni saṅkaḍḍhati. Atha naṃ pubbe veriko amanusso ekissā taruṇavacchāya gāviyā sarīre adhimuccitvā jīvitakkhayaṃ pāpesi. Satthā sāvatthito nikkhamanto antaravīthiyaṃ bāhiyaṃ saṅkāraṭṭhāne patitaṃ disvā "gaṇhatha bhikkhave bāhiyassa sarīran"ti nīharāpetvā sarīrakiccaṃ kāretvā cātummahāpathe cetiyaṃ kārāpesi. Tato saṃghamajjhe kathā udapādi "tathāgato bhikkhusaṃghena bāhiyassa sarīrajjhāpanakiccaṃ kāresi, dhātuyo gahetvā cetiyaṃ kāresi, kataramaggo nu kho tena sacchikato, sāmaṇero nu kho so, bhikkhu nu kho"ti cittaṃ uppādayiṃsu. Satthā taṃ atthuppattiṃ katvā "paṇḍito bhikkhave bāhiyo"ti upari dhammadesanaṃ vaḍḍhetvā tassa parinibbutabhāvaṃ pakāsesi. Sā puna saṃghamajjhe kathā udapādi "na ca satthārā bāhiyassa bahu dhammo desito, arahattaṃ pattoti

@4 cha.Ma.,i. kiccaṃ matthakappattaṃ ñatvā 5 Ma. coḷakkhaṇḍaṃ 6 cha.Ma.,i. bāhiyassa