@3 Sī. satasahassakappe Vītināmetvā "paṭhaviyaṃ ṭhapessāmī"ti pādaṃ abhinīhari. Atha paṭhaviṃ bhinditvā heṭṭhā vuttappamāṇaṃ padumaṃ aṭṭhāsi. Tadupādāya bhagavā padumuttarotveva paññāyittha. Tassa devilo ca sujāto ca dve aggasāvakā ahesuṃ, amitā ca asamā ca dve aggasāvikā, sumano nāma upaṭṭhāko. Padumuttaro bhagavā pitu saṅgahaṃ kurumāno bhikkhusatasahassaparivāro haṃsavatiyā rājadhāniyā paṭivasati.

Kaniṭṭhabhātā panassa sumanakumāro nāma. Tassa rājā haṃsavatīnagarato vīsatiyojanasataṃ bhogagāmaṃ adāsi. So kadāci kadāci āgantvā pitarañca satthārañca passati. Athekadivasaṃ paccanto kupito sumano rañño pesesi. Rājā "tvaṃ mayā tattha kasmā ṭhapito"ti paṭipesesi. So core vūpasametvā "upasanto deva janapado"ti rañño paṭivedesi. Rājā tuṭṭho "sīghaṃ mama putto āgacchatū"ti āha. Tassa sahassamattā amaccā honti. So tehi saddhiṃ antarāmagge mantesi "mayhaṃ pitā tuṭṭho sace me varaṃ deti, kiṃ gaṇhissāmī"ti. Atha naṃ ekacce "hatthiṃ gaṇhatha, assaṃ gaṇhatha, janapadaṃ gaṇhatha, sattaratanāni gaṇhathā"ti āhaṃsu. Apare "tumhe paṭhavissarassa puttā, na tumhākaṃ dhanaṃ dullabhaṃ, laddhaṃpi cetaṃ sabbaṃ pahāya gamanīyaṃ, puññameva etaṃ ādāya. Tasmā deve varaṃ dadamāne temāsaṃ padumuttaraṃ bhagavantaṃ upaṭṭhānavaraṃ gaṇhathā"ti āhaṃsu. So "tumhe mayhaṃ kalyāṇamittā, mametaṃ cittaṃ atthi, tumhehi pana uppāditaṃ, evaṃ karissāmī"ti gantvā pitaraṃ vanditvā pitarā āliṅgitvā matthake cumbitvā "varaṃ te putta demī"ti vutto "icchāmahaṃ mahārāja bhagavantaṃ temāsaṃ catūhi paccayehi upaṭṭhahanto jīvitaṃ acalaṃ kātuṃ, imaṃ me deva varaṃ dehī"ti āha. Na sakkā tāta, aññaṃ vadehīti. Deva khattiyānaṃ nāma dvekathā natthi, etadeva me varaṃ dehi, na mama aññena atthoti. Tāta buddhānaṃ