@phussabuddhassa 4 Sī.,cha.Ma. parivesakaṭṭhāne 5 cha.Ma. attanā
Te pana rājakumārā vuṭṭhavasse dasabale sahatthā buddhappamukhaṃ bhikkhusaṃghaṃ paccayapūjāya pūjetvā yāvajīvaṃ kalyāṇakammaṃ katvā amhākaṃ dasabalassa nibbattito puretarameva brāhmaṇakule nibbattitvā attano gottavasena tayopi janā kassapāeva ca nāma jātā. Te vayappattā tayo vede uggaṇhiṃsu. Tesu jeṭṭhakassa pañca māṇavakasatāni parivāro ahosi, majjhimassa tīṇi, kaniṭṭhassa dve. Te attano ganthe sāraṃ oloketvā diṭṭhadhammikameva passiṃsu, na samparāyikaṃ. Atha nesaṃ jeṭṭhabhātā attano parivārena saddhiṃ uruvelaṃ gantvā isipabbajjaṃ pabbajitvā uruvelakassapo nāma jāto, mahāgaṅgānadīvaṃsake pabbajito nadīkassapo nāma jāto, gayāsīse pabbajito gayākassapo nāma jāto.
Evantesu isipabbajjaṃ pabbajitvā tattha vasantesu bahunnaṃ divasānaṃ accayena amhākaṃ bodhisatto mahābhinikkhamanaṃ nikkhamitvā paṭiladdhasabbaññutañāṇo anukkamena dhammacakkaṃ pavattetvā pañcavaggiyatthere arahatte patiṭṭhāpetvā yasadārakappamukhe pañcapaññāsasahāyakepi vinetvā saṭṭhiṃ arahante "caratha bhikkhave cārikan"ti bahujanahitāya cārikaṃ pesetvā bhaddavaggiye vinetvā uruvelakassapassa hetuṃ disvā "mayi gate tayo bhātikā saparivārā arahattaṃ pāpuṇissantī"ti ñatvā ekako adutiyo uruvelakassapassa vasanaṭṭhānaṃ gantvā vasanatthāya agyāgāraṃ yācitvā tattha gataṃ nāgadamanaṃ ādiṃ katvā aḍḍhuḍḍhasahassehi pāṭihāriyehi uruvelakassapaṃ saparivāraṃ vinetvā pabbājesi. Tassa pabbajitabhāvaṃ ñatvā itarepi dve bhātaro saparivārā āgantvā pabbajiṃsu, sabbepi ehibhikkhū iddhimayapattacīvaradharā ahesuṃ.
Satthā taṃ samaṇasahassaṃ ādāya gayāsīsaṃ gantvā piṭṭhipāsāṇe nisinno "kathaṃ nu kho etesaṃ dhammadesanā sappāyā"ti olokento "ime aggiṃ paricarantā