Atha rājā cintesi "ettakā nāma mayi sinehābhāvena dasabalassa idhāgamanatthāya na kiñci kathayiṃsu, añño gantvāpi dasabalaṃ ānetuṃ na sakkhissati. Mayhaṃ kho pana putto udāyī dasabalena saddhiṃ ekavasso sahapaṃsukīḷiko, mayi cassa sineho atthī"ti kāḷudāyiṃ pakkosāpetvā "tāta purisasahassaparivāro gantvā dasabalaṃ ānehī"ti āha. Paṭhamaṃ gatā purisā viya pabbajituṃ labhanto ānessāmi devāti. Yaṅkiñci katvā mama puttaṃ dassehīti. "sādhu devā"ti rañño sāsanaṃ ādāya rājagahaṃ gantvā satthu dhammadesanavelāyeva parisapariyante ṭhito dhammaṃ sutvā saparivāro arahattaphalaṃ patvā ehibhikkhubhāve patiṭṭhāsi. Tato cintesi "na tāva dasabalassa kulanagaraṃ gantuṃ esa kālo, vasantasamaye pupphitesu vanasaṇḍesu haritatiṇasañchannāya paṭhaviyā esa kālo bhavissatī"ti kālaṃ paṭimānento tassa kālassa āgatabhāvaṃ ñatvā:-

"nātisītaṃ nātiuṇhaṃ nātidubbhikkhachātakaṃ

saddalā haritā bhūmi esa kālo mahāmunī"ti