Athekasmiṃ samaye tathāgatassa udaravāto uppajji. Tāpaso satthu dassanāya āgato "satthā gilāno"ti sutvā "ko bhante ābādho"ti. "udaravāto"ti vutte "ayaṃ kālo mayhaṃ puññaṃ kātun"ti pabbatapādaṃ gantvā nānāvidhāni bhesajjāni samodhānetvā "idaṃ bhesajjaṃ satthu upanethā"ti upaṭṭhākattherassa adāsi. Saha bhesajjassa upayogena udaravāto paṭippassambhi. So satthu phāsukakāle gantvā evamāha "bhante yadidaṃ mama bhesajjena tathāgatassa phāsukaṃ jātaṃ, tassa me nissandena nibbattanibbattabhave kesoduhanamattaṃpi sarīre byādhi nāma mā hotū"ti. Idamassa tasmiṃ attabhāve kalyāṇakammaṃ.

So tato cuto brahmaloke nibbattitvā ekaṃ asaṅkhyeyyaṃ devamanussesu saṃsaranto padumuttarabuddhakāle haṃsavatīnagare kulagehe paṭisandhiṃ gahetvā satthāraṃ ekaṃ bhikkhuṃ appābādhānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi.

@4 Ma. guduhaṇamattampi, cha.,i. gaddūhanamattampi 5 Sī. sarīravyādhi