So yāvatāyukaṃ kusalaṃ katvā devamanussesu saṃsaranto vipassidasabalassa nibbattito puretarameva bandhumatīnagare brāhmaṇakule nibbatto purimanayeneva isipabbajjaṃ pabbajitvā jhānalābhī hutvā pabbatapāde vasati.

Vipassibodhisattopi sabbaññutaṃ patvā aṭṭhasaṭṭhibhikkhusatasahassaparivāro bandhumatīnagaraṃ upanissāya pitumahārājassa saṅgahaṃ karonto kheme migadāye viharati. Athāyaṃ tāpaso dasabalassa loke nibbattabhāvaṃ ñatvā āgantvā satthu dhammakathaṃ sutvā saraṇesu patiṭṭhāsi, attano pabbajjaṃ pajahituṃ nāsakkhi, kālena kālaṃ pana satthu upaṭṭhānaṃ āgacchati.

Athekasmiṃ samaye ṭhapetvā satthārañceva dve aggasāvake ca himavati pupphitānaṃ visarukkhānaṃ vātasamphassena bhikkhūnaṃ matthakarogo nāma udapādi. Tāpaso satthu upaṭṭhānaṃ āgato bhikkhū sīsaṃ pārupitvā nisinne disvā "kiṃ bhante bhikkhusaṃghasasa aphāsukan"ti pucchi. Bhikkhūnaṃ visapuppharogo āvusoti. Tāpaso cintesi "ayaṃ kālo mayhaṃ bhikkhusaṃghassa kāyaveyyāvaṭikakammaṃ katvā puññaṃ nibbattetun"ti attano ānubhāvena nānāvidhāni bhesajjāni saṅkaḍḍhitvā yojetvā adāsi. Sabbabhikkhūnaṃ rogo taṃkhaṇaññeva vūpasanto.

So yāvatāyukaṃ ṭhatvā brahmaloke nibbattitvā ekanavutikappe devamanussesu saṃsaranto kassapabuddhakāle bārāṇasiyaṃ kulagehe nibbatto gharāvāsaṃ vasanto "mayhaṃ vasanagehaṃ dubbalaṃ, paccantaṃ gantvā dabbasambhāraṃ āharitvā gehaṃ karissāmī"ti vaḍḍhakīhi saddhiṃ gacchanto antarāmagge ekaṃ jiṇṇamahāvihāraṃ disvā "tiṭṭhatu tāva mayhaṃ gehakammaṃ, na taṃ mayā saddhiṃ gamissati, yaṅkiñci katvā pana saddhiṃ gamanakammameva puretaraṃ kātuṃ vaṭṭatī"ti teheva vaḍḍhakīhi dabbasambhāraṃ gāhāpetvā