@5 Sī.,i.,cha.Ma. sasīsaṃ pārupitvā nipanne 6 cha. tiṇapupphakarogo

@7 i. kāyaveyyāvaṭikaṃ Tasmiṃ vihāre uposathāgāraṃ kāresi, bhojanasālaṃ aggisālaṃ jantāgharaṃ kappiyakuṭiṃ rattiṭṭhānadivāṭṭhānaṃ vaccakuṭiṃ kāresi, yaṃ bhikkhusaṃghassa upabhogaparibhogabhesajjaṃ nāma, sabbaṃ paṭiyādetvā ṭhapesi.

So yāvajīvaṃ kusalaṃ katvā ekaṃ buddhantaraṃ devamanussesu saṃsaranto amhākaṃ dasabalassa nibbattito puretarameva kosambiyaṃ seṭṭhigehe paṭisandhiṃ gaṇhi. Tassa paṭisandhigahaṇadivasato paṭṭhāya taṃ seṭṭhikulaṃ lābhaggayasaggappattaṃ ahosi. Athassa mātā puttaṃ vijāyitvā cintesi "ayaṃ dārako puññavā katābhinīhāro, yattakaṃ kālaṃ arogo dīghāyuko hutvā tiṭṭhati, tattakaṃ amhākaṃ sampattidāyako bhavissati. Jātadivaseyeva ca mahāyamunāya nhātadārakā nirogā hontī"ti nhāpanatthāya naṃ pesesi. "pañcame divase sīsaṃ nhāpetvā nadīkīḷanatthāya naṃ pesesī"ti majjhimabhāṇakā. Tattha dhātiyā dārakaṃ nimujjanummujjanavasena kīḷāpentiyā eko maccho taṃ dārakaṃ disvā "bhakkho me ayan"ti maññamāno mukhaṃ vivaritvā upagato. Dhātiyo dārakaṃ chaḍḍetvā palātā, maccho taṃ gili. Puññavā satto dukkhaṃ na pāpuṇi, sayanagabbhaṃ pavisitvā nisinno viya hoti. Maccho dārakassa tejena tattakapālaṃ gilitvā ḍayhamāno viya vegena tiṃsayojanaṃ gantvā bārāṇasinagaravāsino macchabandhassa jālaṃ pāvisi. Mahāmacchā nāma jālena bandhā māriyamānāva maranti, ayaṃ pana dārakassa tejena jālato nīhaṭamattova mato. Macchabandhā matamacchaṃ labhitvā phāletvā vikkiṇanti, taṃ pana dārakassa ānubhāvena aphāletvā sakalameva kājena haritvā "sahassenimaṃ demā"ti vadantā nagare vicariṃsu, koci na gaṇhīti.