@9 cha.Ma. mahāmacchaṃ 10 cha.Ma. gaṇhāti 11 Sī.,i.,cha.Ma. tasmiṃ pana nagare aputtakaṃ

@asītikoṭivibhavaṃ Seṭṭhibhariyāpi aññesu divasesu macchena kīḷāyati, taṃdivasaṃ pana macchaṃ phalake ṭhapetvā sayameva phālesi. Macchaṃ nāma kucchito phālenti, sā pana piṭṭhito phālentī macchakucchiyaṃ suvaṇṇavaṇṇaṃ dārakaṃ disvā "macchakucchiyaṃ me putto laddho"ti nadanaṃ naditvā dārakaṃ ādāya sāmikassa santikaṃ agamāsi. Seṭṭhī tāvadeva bheriñcārāpetvā dārakaṃ ādāya rañño santikaṃ gantvā "macchakucchiyaṃ me deva laddho dārako, kiṃ karomā"ti āha. Puññavā esa, yo macchakucchiyaṃ arogo vasi, pālehi nanti.

Assosi kho itaraṃ kulaṃ "bārāṇasiyaṃ kira ekaṃ seṭṭhikulaṃ macchakucchiyaṃ dārakaṃ labhatī"ti. Te tattha agamaṃsu. Athassa mātā dārakaṃ alaṅkaritvā kīḷāpiyamānaṃ disvā "manāpo vatāyaṃ dārako"ti pucchitvā taṃ pavuttiṃ ācikkhi. Itarā "mayhaṃ putto"ti āha. Kahaṃ pana laddhoti. Macchakucchiyanti. Na tuyhaṃ putto, mayhaṃ puttoti. Kathante laddhoti. Mayā dasamāse kucchiyā dhārito, atha naṃ nadiyā kīḷāpiyamānaṃ maccho gilīti. Tuyhaṃ putto aññena macchena gilito bhavissati, ayaṃ pana mayā macchakucchiyaṃ laddhoti ubhopi rājakulaṃ agamaṃsu. Rājā āha "ayaṃ dasamāse kucchiyā dhāritattā amātā kātuṃ na sakkā, macchaṃ gaṇhantāpi vikkayakayādīni bahi katvā gaṇhantā nāma natthi, macchakucchiyaṃ laddhattā ayaṃpi amātā kātuṃ na sakkāti dārako ubhinnaṃpi kulānaṃ dāyādo hotū"ti. Tato paṭṭhāya dvepi kulāni ativiya lābhaggayasaggappattāni ahesuṃ. Tassa dvīhi kulehi vaḍḍhitattā bākulakumāroti nāmaṃ kariṃsu.

Tassa viññutaṃ pattassa dvīsupi nagaresu tayo tayo pāsāde kāretvā nāṭakāni paccupaṭṭhapesuṃ. Ekekasmiṃ nagare cattāro cattāro māse vasati, ekekasmiṃ nagare cattāro māse vuṭṭhassa saṅghāṭanāvāsu maṇḍapaṃ kāretvā tattha naṃ saddhiṃ nāṭakehi āropenti. So sampattiṃ anubhavamāno catūhi māsehi itaraṃ nagaraṃ gacchati. Taṃ nagaravāsināṭakā "dvīhi māsehi upaḍḍhamaggaṃ āgato bhavissatī"ti paccuggantvā