@pakatiṃ 5 cha.Ma.,i. vakkayakanādīni 6 cha.Ma. natthīti 7 cha.Ma. na sakkā Taṃ parivāretvā dvīhi māsehi attano nagaraṃ nenti, itarā nāṭakā nivattitvā attano nagarameva gacchanti. Tattha cattāro māse vasitvā teneva niyāmena puna itaraṃ nagaraṃ gacchati. Evamassa sampattiṃ anubhavantassa asīti vassāni paripuṇṇāni.

Tasmiṃ samaye amhākaṃ bodhisatto sabbaññutaṃ patvā pavattitapavaradhammacakko anukkamena cārikaṃ caramāno kosambiṃ pāpuṇi, bārāṇasinti majjhimabhāṇakā. Bākulaseṭṭhīpi kho "dasabalo āgato"ti sutvā bahuṃ gandhamālaṃ ādāya satthu santikaṃ gantvā dhammaṃ sutvā paṭiladdhasaddho pabbaji. So sattāhameva puthujjano hutvā aṭṭhame aruṇe saha paṭisambhidāhi arahattaṃ pāpuṇi. Athassa dvīsu nagaresu gihikāle paricitamātugāmā attano kulagharāni gantvā tattheva vasamānā cīvarāni katvā pahiṇiṃsu. Thero ekaṃ aḍḍhamāsaṃ kosambivāsikehi pahitaṃ cīvaraṃ paribhuñjati, aḍḍhamāsaṃ bārāṇasivāsikehīti. Eteneva niyāmena ca dvīsu nagaresu yaṃ yaṃ uttamaṃ, taṃ taṃ therasseva āharissanti. Therassa asīti vassāni agāramajjhe vasantassa dvīhi kulehi gandhapiṇḍaṃ gahetvā upasiṅghanamattaṃpi kālaṃ na koci ābādho nāma ahosi. Asītime vasse sukheneva pabbajjaṃ upagato. Pabbajitassāpissa appamattakopi ābādho vā catūhi paccayehi vekallaṃ vā nāhosi. So pacchimakāle parinibbānasamayepi purāṇagihisahāyakassa acelakassa attano kāyikacetasikasukhadīpanavaseneva sakalaṃ bākulasuttaṃ kathetvā anupādisesāya nibbānadhātuyā parinibbāyi. Evaṃ atthuppatti samuṭṭhitā. Satthā pana therassa dharamānakāleyeva there yathāpaṭipāṭiyā ṭhānantare ṭhapayanto bākulattheraṃ imasmiṃ sāsane appābādhānaṃ aggaṭṭhāne ṭhapesīti.