Tassa pañhākamme ayamanupubbikathā:- ayañhi padumuttarabuddhakāle haṃsavatīnagare kulagehe nibbatto satthu dhammakathaṃ suṇanto satthāraṃ ekaṃ bhikkhuṃ bhikkhunovādakānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi. So yāvajīvaṃ kusalaṃ katvā devamanussesu saṃsaranto imasmiṃ buddhuppāde sāvatthiyaṃ kulagehe paṭisandhiṃ gahetvā vayappatto satthu dhammadesanaṃ sutvā paṭiladdhasaddho satthu santike pabbajitvā vipassanaṃ vaḍḍhetvā arahattaṃ pāpuṇi, pubbenivāsañāṇe ciṇṇavasī ahosi. So catūsu parisāsu sampattāsu "sabbesaṃyeva manaṃ gahetvā kathetuṃ sakkotī"ti dhammakathikanandako nāma jāto. Tathāgatopi kho rohiṇīnadītīre cumbiṭakulagehā nikkhamitvā pabbajitānaṃ pañcannaṃ sākiyakumārasatānaṃ anabhiratiyā uppannāya te bhikkhū ādāya kuṇāladahaṃ gantvā kuṇālajātakakathāya nesaṃ saṃviggamānasabhāvaṃ ñatvā catusaccakathaṃ kathetvā sotāpattiphale patiṭṭhāpesi. Aparabhāge mahāsamayasuttaṃ kathetvā aggaphalaṃ arahattaṃ pāpesi. Tesaṃ therānaṃ purāṇadutiyikā "amhedāni idha kiṃ karissāmā"ti vatvā sabbāva ekacittā hutvā mahāpajāpatiṃ upasaṅkamitvā pabbajjaṃ yāciṃsu. Tāpi pañcasatā theriyā santike pabbajjañca upasampadañca labhiṃsu. Atītānantarāyaṃ pana jātiyā sabbāva tā nandakattherassa rājattabhāve ṭhitassa pādaparicārikā ahesuṃ.

@aṅ.ekaka. 20/229/25 2 Sī.,i. kulaghare 3 cha.Ma. dhammadesanaṃ 4 Sī.,i. pāpuṇitvā

@5 Sī.,i. cumbaṭakakalahe, Ma. cumbaṭakalahato, cha. cumbuṭakakalahe