@6 khu.jā. 28/296/106 (syā) 7 cha.Ma.,i. saṃviggabhāvaṃ

@8 dī.Ma. 10/331/216 9 cha.Ma. rājaputtabhāve

Tena samayena satthā "bhikkhū bhikkhuniyo ovadantū"ti āha. Thero attano vāre sampatte tāsaṃ purimabhave attano pādaparicārikabhāvaṃ ñatvā cintesi "maṃ imassa bhikkhunīsaṃghassa majjhe nisinnaṃ upamāyo ca kāraṇādīni ca āharitvā dhammaṃ kathayamānaṃ disvā añño pubbenivāsañāṇalābhī bhikkhu imaṃ kāraṇaṃ oloketvā `āyasmā nandako yāvajjadivasā orodhe na vissajjeti, sobhatāyasmā orodhaparivuto'ti vattabbaṃ maññeyyā"ti. Tasmā sayaṃ agantvā aññaṃ bhikkhuṃ pesesi. Tā pana pañcasatā bhikkhuniyo therassa ovādaṃ paccāsiṃsanti. Iminā kāraṇena bhagavā "attano vāre sampatte aññaṃ apesetvā sayameva gantvā bhikkhunīsaṃghaṃ ovadāhī"ti theraṃ āha. So satthu kathaṃ paṭibāhituṃ asakkonto attano vāre sampatte cātuddase bhikkhunīsaṃghe ovādaṃ datvā sabbāva tā bhikkhuniyo saḷāyatanapaṭimaṇḍitāya dhammadesanāya sotāpattiphale patiṭṭhāpesi.

Tā bhikkhuniyo therassa dhammadesanāya attamanā hutvā satthu santikaṃ gantvā attano paṭividdhaguṇaṃ ārocesuṃ. Satthā "kasmiṃ nu kho dhammaṃ desente imā bhikkhuniyo uparimaggaphalāni pāpuṇeyyun"ti āvajjento puna "etaṃ nandakassa dhammadesanaṃ sutvā pañcasatāpi etā arahattaṃ pāpuṇissantī"ti disvā punadivasepi therasseva santike dhammassavanatthāya pesesi. Tā punadivase dhammaṃ sutvā sabbāva arahattaṃ pattā. Taṃdivasaṃ bhagavā tāsaṃ bhikkhunīnaṃ attano santikaṃ āgatakāle dhammadesanāya saphalabhāvaṃ ñatvā "hiyyo nandakassa dhammadesanā cātuddasiyaṃ candasadisī ahosi, ajja pannarasiyaṃ candasadisī"ti vatvā tadeva kāraṇaṃ atthuppattiṃ katvā theraṃ bhikkhunovādakānaṃ aggaṭṭhāne ṭhapesīti.