Tena kho pana samayena amhākaṃ satthā loke nibbattitvā sāvatthiṃ upanissāya paṭivasati. Tasmiṃ kāle sāvatthinagaravāsino vāṇijā sāvatthiyaṃ uṭṭhānabhaṇḍaṃ gahetvā taṃ nagaraṃ gantvā bhaṇḍaṃ paṭisāmetvā "rājānaṃ passissāmā"ti paṇṇākāraṃ gahetvā rājakuladvāraṃ gantvā "rājā uyyānaṃ gato"ti sutvā uyyānaṃ gantvā dvāre ṭhitā paṭihārakassa ārocayiṃsu. Atha rañño nivedite rājā pakkosāpetvā niyyānite paṇṇākāre vanditvā ṭhite "tātā kuto āgacchathā"ti pucchi. Sāvatthito devāti. Kacci te raṭṭhā subhikkhā, dhammiko rājāti. Āma devāti. Attha pana tumhākaṃ dese kiñci sāsananti. Atthi deva, na sakkā pana ucchiṭṭhamukhehi kathetunti. Rājā suvaṇṇabhiṅgārena udakaṃ dāpesi. Te mukhaṃ vikkhāletvā dasabalābhimukhā añjaliṃ paggahetvā "deva amhākaṃ dese buddharatanaṃ nāma uppannan"ti āhaṃsu.

@5 cha.Ma. nivedi, te 6 Ma. niyyātitena paṇṇākārena, cha. niyyātitapaṇṇākāre,

@i. niyyānitapaṇṇākāre 7 Sī.,i.,cha.Ma. kacci vo raṭṭhaṃ subhikkhaṃ