@8 Sī.,i. paggaṇhitvā Rañño "buddho"ti vacane sutamatteyeva sakalasarīraṃ pharamānā pīti uppajji. Tato "buddhoti tātā vadathā"ti āha. Buddhoti deva vadāmāti. Evaṃ tikkhattuṃ vadāpetvā "buddhoti padaṃ appamāṇaṃ, na sakkā parimāṇaṃ kātun"ti tasmiṃyeva uppannanti pasanno satasahassaṃ datvā puna "aparaṃ kiṃ sāsanan"ti pucchi. Deva dhammaratanaṃ nāma uppannanti. Taṃpi sutvā tatheva tikkhattuṃ paṭiññaṃ gahetvā aparaṃpi satasahassaṃ datvā puna "aññaṃ kiṃ sāsanan"ti pucchi. Saṃgharatanaṃ deva uppannanti. Taṃ sutvā tatheva paṭiññaṃ gahetvā aparaṃpi satasahassaṃ datvā dinnabhāvaṃ paṇṇe likhitvā "tātā deviyā santikaṃ gacchathā"ti pesesi. Tesu gatesu amacce pucchi "tātā buddho loke uppanno, tumhe kiṃ karissathā"ti. Deva tumhe kiṃ karissathāti. Ahaṃ pabbajissāmīti. Mayaṃpi pabbajissāmāti. Te sabbepi gharaṃ vā kuṭumbaṃ vā anapaloketvā ye asse āruyha gatā teheva nikkhamiṃsu.
Vāṇijā anojādeviyā santikaṃ gantvā paṇṇaṃ dassesuṃ. Sā taṃ vācetvā "raññā tumhākaṃ bahū kahāpaṇā dinnā, kiṃ tumhehi kataṃ tātā"ti pucchi. Piyasāsanaṃ devi ānītanti. Amhepi sakkā tātā suṇāpetunti. Sakkā devi, ucchiṭṭhamukhehi pana vattuṃ na sakkāti. Sā suvaṇṇabhiṅgārena udakaṃ dāpesi. Te mukhaṃ vikkhāletvā rañño ārocitaniyāmeneva ārocesuṃ. Sāpi taṃ sutvā uppannapāmujjā teneva nayena ekasmiṃ pade tikkhattuṃ paṭiññaṃ gāhāpetvā padagaṇanāya tīṇi tīṇi datvā navasatasahassāni adāsi. Vāṇijā sabbānipi dvādasa satasahassāni labhiṃsu. Atha te "rājā kahaṃ tātā"ti pucchi. Pabbajissāmīti nikkhanto devīti. "tenahi tātā tumhe gacchathā"ti uyyojetvā raññā saddhiṃ gatānaṃ amaccānaṃ mātugāme pakkosāpetvā "tumhe attano sāmikānaṃ gataṭṭhānaṃ jānātha ammā"ti pucchi. Na jānāma ayye, raññā saddhiṃ uyyānakīḷaṃ gatāti. Āma ammā gatā,
@5 cha.Ma. gahetvā paṭiññāgaṇanāya 6 cha.Ma. katvā 7 cha.Ma. ayaṃ saddo na dissati Tattha pana gantvā "buddho uppanno, dhammo uppanno, saṃgho uppanno"ti sutvā "dasabalassa santike pabbajissāmā"ti gatā, tumhe kiṃ karissathāti. Tumhe pana ayye kiṃ kattukāmāti. Ahaṃ pabbajissāmi, na tehi vantavamanaṃ jivhagge ṭhapeyyanti. "yadi evaṃ, mayaṃ pabbajissāmā"ti. Sabbāpi rathe yojāpetvā nikkhamiṃsu.