Rājāpi amaccasahassehi saddhiṃ gaṅgātīraṃ pāpuṇi, tasmiṃ ca samaye gaṅgā pūrā hoti. Atha naṃ disvā "ayaṃ gaṅgā pūrā hoti caṇḍamacchākiṇṇā, amhehi ca saddhiṃ āgatā dāsā vā manussā vā natthi, ye te nāvaṃ vā ullumpaṃ vā amhākaṃ tattha dadeyyuṃ. Etassa pana satthu guṇā nāma heṭṭhā avīcito upari yāva bhavaggā patthaṭā. Sace pana satthā sammāsambuddho, imesaṃ assānaṃ khurapiṭṭhāni mā tementūti udakapiṭṭhena asse pakkhandāpesuṃ. Ekassāpi khurapiṭṭhimattaṃpi na temi, rājamaggena gacchantā viya paratīraṃ patvā parato aññaṃ mahānadiṃ pāpuṇiṃsu. "dutiyā kiṃ nāmā"ti pucchi. Nīlavāhā nāma gambhīratopi puthulatopi aḍḍhayojanamattā devāti. Tattha aññā saccakiriyā natthi, tāyaeva saccakiriyāya taṃpi aḍḍhayojanavitthāraṃ nadiṃ atikkamiṃsu. Atha tatiyaṃ candabhāgaṃ nāma mahānadiṃ patvā taṃpi tāyaeva saccakiriyāya atikkamiṃsu.

Satthāpi taṃdivasaṃ paccūsasamaye mahākaruṇāsamāpattito vuṭṭhāya lokaṃ volokento "ajja mahākappino tiyojanasatikaṃ rajjaṃ pahāya amaccasahassaparivāro mama santike pabbajituṃ āgacchissatī"ti disvā "mayā tesaṃ paccuggamanaṃ kātuṃ yuttan"ti pātova sarīrapaṭijagganaṃ katvā bhikkhusaṃghaparivāro sāvatthiyaṃ piṇḍāya caritvā pacchābhattaṃ piṇḍapātapaṭikkanto sayameva pattacīvaraṃ gahetvā ākāsena uppatitvā candabhāgānadītīre tesaṃ uttaraṇatitthānaṃ abhimukhaṭṭhāne mahānigrodharukkho atthi, tattha pallaṅkena nisīditvā parimukhaṃ satiṃ upaṭṭhapetvā chabbaṇṇabuddharasmiyo vissajjesi. Te tena

@dadeyyuṃ 5 cha.Ma. esa 6 cha.Ma. ekassa assassāpi 7 cha.Ma. nīlavāhinī