@8 cha.Ma. āgacchatīti Titthena uttaranti buddharasmiyo ito cito ca dhāvantiyo oloketvā dasabalassa puṇṇacandasassirikaṃ mukhaṃ disvā "yaṃ satthāraṃ uddissa mayaṃ pabbajitā, satthā no eso"ti dassaneneva niṭṭhaṃ gantvā diṭṭhaṭṭhānato paṭṭhāya oṇamitvā vandamānā āgamma satthāraṃ vandiṃsu. Rājā satthu gopphakesu gahetvā satthāraṃ vanditvā ekamantaṃ nisīdi saddhiṃ amaccasahassena. Satthā tesaṃ dhammakathaṃ kathesi. Desanāpariyosāne sabbe arahatte patiṭṭhāya satthāraṃ pabbajjaṃ yāciṃsu. Satthā "pubbe imehi cīvaradānassa dinnattā attano pattacīvarāni gahetvā āgatā"ti suvaṇṇavaṇṇaṃ hatthaṃ pasāretvā "etha bhikkhavo, svākkhāto dhammo, caratha brahmacariyaṃ sammādukkhassantakiriyāyā"ti āha. Sā ca tesaṃ āyasmantānaṃ pabbajjā ca upasampadā ca ahosi, vassasatikattherā viya satthāraṃ parivārayiṃsu.

Anojāpi devī rathasahassaparivārā gaṅgātīraṃ patvā uttaraṇatthāya āgataṃ nāvaṃ vā ullumpaṃ vā adisvā attano byattatāya cintesi "rājā saccakiriyaṃ katvā gato bhavissati, so pana satthā na kevalaṃ tesaṃyeva atthāya nibbatto, sace so satthā sammāsambuddho, amhākaṃ rathā mā udake nimujjiṃsū"ti udakapiṭṭhena rathe pakkhandāpesi. Rathānaṃ nemicakkamattaṃpi na temi. Dutiyaṃ nadiṃpi tatiyaṃ nadiṃpi teneva saccakaraṇena uttari. Uttaramānāeva ca nigrodharukkhamūle satthāraṃ addasa. Satthāpi "imāsaṃ attano sāmino passantīnaṃ chandarāgo uppajji maggaphalānaṃ antarāyaṃ kareyya, dhammaṃ sotuñca na sakkhissantī"ti yathā aññamaññaṃ na passanti, tathā akāsi. Tā sabbāpi titthato uttaritvā dasabalaṃ vanditvā nisīdiṃsu. Satthā tāsaṃ dhammakathaṃ kathesi. Desanāpariyosāne sabbā sotāpattiphale patiṭṭhāya aññamaññaṃ passiṃsu. Satthā "uppalavaṇṇā āgacchatū"ti cintesi. Therī āgantvā sabbā pabbājetvā ādāya bhikkhunīupassayaṃ gatā, satthā bhikkhusahassaṃ gahetvā ākāsena jetavanaṃ agamāsi.