Athekadivasaṃ satthā tassa antevāsikaṃ bhikkhusahassaṃ āmantetvā āha "kacci vo bhikkhave ācariyo dhammaṃ desetī"ti. Na bhagavā desesi, appossukko diṭṭhadhammasukhavihāraṃ anuyutto viharati, kassaci ovādamattampi na detīti. Satthā taṃ pakkosāpetvā "saccaṃ kira tvaṃ kappina antevāsikānaṃ ovādamattaṃpi na desī"ti. Saccaṃ bhagavāti. Brāhmaṇa mā evaṃ kari, ajjato paṭṭhāya antevāsikānaṃ dhammaṃ desehīti. "sādhu bhante"ti thero satthu kathaṃ sirasāva sampaṭicchitvā ekasamodhāneyeva samaṇasahassassa dhammaṃ desetvā sabbe arahattaṃ pāpesi. Aparabhāge satthā saṃghamajjhe nisinno paṭipāṭiyā there ṭhānantaresu ṭhapento mahākappinattheraṃ bhikkhuovādakānaṃ aggaṭṭhāne ṭhapesīti.

Sāgatattheravatthu

[232] Dasame tejodhātukusalānanti tejodhātuṃ samāpajjituṃ kusalānaṃ sāgatatthero aggoti dasseti. Ayañhi thero tejodhātusamāpattiyā ambatitthanāgassa tejasā tejaṃ pariyādiyitvā taṃ nāgaṃ nibbisevanaṃ akāsi. Tasmā tejodhātukusalānaṃ aggo nāma jāto.