Rādhattheravatthu

[233] Ekādasame paṭibhāṇeyyakānanti satthu dhammadesanāpaṭibhāṇassa paccayabhūtānaṃ paṭibhāṇajanakānaṃ.

Tassa pañhākamme ayamanupubbikathā:- ayaṃ padumuttarabuddhakāle haṃsavatiyaṃ kulagehe nibbattitvā aparabhāge satthu dhammadesanaṃ suṇanto satthāraṃ ekaṃ bhikkhuṃ paṭibhāṇeyyakānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi. So yāvajīvaṃ tathāgataṃ paricaritvā devamanussesu saṃsaranto imasmiṃ buddhuppāde rājagahanagare brāhmaṇagehe paṭisandhiṃ gaṇhi, rādhamāṇavotissa nāmaṃ akaṃsu.

So mahallakakāle attano puttadārena abahumāno "pabbajitvā kālaṃ vītināmessāmī"ti vihāraṃ gantvā there pabbajjaṃ yāci, "jiṇṇo mahallaka- brāhmaṇo"ti na keci pabbājetuṃ icchiṃsu. Athekadivasaṃ brāhmaṇo satthu santikaṃ gantvā paṭisaṇṭhāraṃ katvā ekamantaṃ nisīdi. Satthā tassa upanissayasampattiṃ disvā kathaṃ samuṭṭhāpetukāmo "kiṃ brāhmaṇa puttadārā taṃ paṭijaggantī"ti. Kuto bho gotama paṭijagganaṃ, mahallakoti maṃ bahi nīhariṃsu. Kiṃ pana te brāhmaṇa pabbajituṃ