Atha naṃ thero gahetvā dasabalaṃ passituṃ āgato. Satthā jānantova pucchi "yo te mayā sāriputta nissitako dinno, kīdisaṃ tassa, na ukkaṇṭhatī"ti. Bhante sāsane abhiramako nāma bhikkhu evarūpo bhaveyyāti. Athāyasmā sāriputtatthero kataññū katavedīti saṃghamajjhe kathā udapādi. Taṃ sutvā satthā bhikkhū āmantesi "anacchariyaṃ bhikkhave sāriputtassa idāni kataññukataveditā, so atīte ahetukapaṭisandhiyaṃ nibbattopi kataññūkatavedīyeva ahosī"ti. Katarasmiṃ kāle bhagavāti.

Atīte bhikkhave pabbatapādamhi pañcasatamattā vaḍḍhakipurisā mahāaraññaṃ pavisitvā dabbasambhāre chinditvā mahāullumpaṃ bandhitvā nadiyā otārenti. Atheko hatthināgo ekasmiṃ visamaṭṭhāne soṇḍāya sākhaṃ gaṇhanto sākhābhaṅgaṃ sandhāretuṃ asakkonto tikhiṇakhāṇuke pādehi aṭṭhāsi, pādo viddho, dukkhavedanā vattanti. So gamanaṃ abhinīharituṃ asakkonto tattheva nipajji. So katipāhaccayena te vaḍḍhakī attano samīpena gacchante disvā "ime nissāya ahaṃ jīvitaṃ labhissāmī"ti tesaṃ anupadaṃ agamāsi. Te nivattitvā hatthiṃ disvā bhītā palāyanti. So tesaṃ palāyanabhāvaṃ ñatvā aṭṭhāsi, puna ṭhitakāle anubandhi.

@4 Sī. abhiramaṇakabhikkhu, cha.Ma. abhiramitabhikkhu nāma 5 cha.Ma. athāyasmato sāriputtassa