@"sāriputtatthero.... 6 cha.Ma.,i. sākhābhaṅgavegaṃ 7 cha.Ma.,i. pādena avatthāsi

Vaḍḍhakijeṭṭhako cintesi "ayaṃ hatthī amhesu tiṭṭhantesu anubandhi, palāyantesu tiṭṭhati, bhavissati tattha kāraṇan"ti. Sabbe taṃ taṃ rukkhaṃ āruyha tassa āgamanaṃ paṭimānentā nisīdiṃsu. So tesaṃ santikaṃ āgantvā attano pādaṃ dassento parivattetvā nipajji. Tadā vaḍḍhakīnaṃ saññā udapādi "gilānabhāvena bho esa āgacchati, na aññena kāraṇenā"ti tassa santikaṃ gantvā pāde paviṭṭhakhāṇukaṃ disvā "iminā kāraṇena esa āgato"ti tikhiṇavāsiyā khāṇukoṭiyaṃ odhiṃ katvā daḷhāya rajjuyā bandhitvā kaḍḍhitvā nīhariṃsu. Athassa vaṇamukhaṃ pīḷetvā pubbalohitaṃ nīharitvā kasāvodakena dhovitvā attano jānanabhesajjaṃ makkhetvā nacirasseva phāsukaṃ akaṃsu.

Hatthināgo gilānā vuṭṭhito cintesi "ime mayhaṃ bahupakārā, ime mayā nissāya jīvitaṃ laddhaṃ, mayā imesaṃ kataññunā katavedinā bhavituṃ vaṭṭatī"ti attano vasanaṭṭhānaṃ gantvā setaṃ hatthipotakaṃ ānesi. Vaḍḍhakino hatthipotakaṃ disvā "amhākaṃ hatthī puttaṃpi gahetvā āgato"ti ativiya tuṭṭhacittā ahesuṃ. Hatthināgo cintesi "mayi tiṭṭhante `kiṃ nu kho ayaṃ āgato'ti mama āgatakāraṇaṃ jānissantī"ti ṭhitaṭṭhānato apakkami. Hatthipotako pitu pacchato anupaṭipajjati. Hatthināgo tassa āgatabhāvaṃ ñatvā nivattanatthāya saddasaññaṃ adāsi. So pitu kathaṃ sutvā nivattitvā vaḍḍhakīnaṃ santikaṃ gato. Vaḍḍhakino "imaṃ hatthipotakaṃ amhākaṃ dātuṃ āgato bhavissati eso"ti ñatvā āhaṃsu "amhākaṃ santike tayā kattabbakiccaṃ natthi, pitu santikaṃyeva gacchā"ti pahiṇiṃsu. Hatthināgo yāvatatiyaṃ attano santikaṃ āgataṃpi puna vaḍḍhakīnaṃyeva samīpaṃ pesesi. Tato paṭṭhāya vaḍḍhakino hatthipotakaṃ attano santike katvā paṭijagganti. Bhojanakāle ekekaṃ bhattapiṇḍaṃ denti, bhattaṃ tassa yāvadatthaṃ ahosi. Atha so