@3 khu.dha. 25/76/30 rādhattheravatthu 4 cha.Ma.,i. satthalūkhaṃ suttalūkhaṃ rajanalūkhanti

@5 cha.Ma.,i. dhāresi

Tasmiṃ kāle kassapadasabalo loke uppajji. Kaṭṭhavāhanarājā "buddho kira loke uppanno"ti sutvā taṃ pakkosāpetvā āha "tāta buddho kira loke uppanno, imañca paccantanagaraṃ ekappahāreneva ubhohi amhehi tucchakaṃ kātuṃ na sakkā, tvaṃ tāva majjhimadesaṃ gantvā buddhassa uppannabhāvaṃ ñatvā dasabalaṃ gahetvā imaṃ nagaraṃ ānehī"ti purisasahassena saddhiṃ pesesi. So anupubbena satthu santikaṃ gantvā dhammakathaṃ sutvā paṭiladdhasaddho tattheva pabbajitvā vīsati vassasahassāni samaṇadhammaṃ akāsi. Tena saddhiṃ gatapurisā pana sabbepi nivattitvā puna rañño santikaṃ āgatā.

Ayaṃpi thero paripuṇṇasīlo kālaṃ katvā ekaṃ buddhantaraṃ devamanussesu saṃsaranto amhākaṃ dasabalassa nibbattito puretarameva sāvatthiyaṃ brāhmaṇagehe paṭisandhiṃ gaṇhi, mogharājamāṇavotissa nāmaṃ akaṃsu. Kaṭṭhavāhanarājāpi kassapassa bhagavato adhikārakammaṃ katvā ekaṃ buddhantaraṃ saparivāro devamanussesu saṃsaritvā amhākaṃ dasabalassa nibbattito puretarameva sāvatthiyaṃ purohitagehe paṭisandhiṃ gaṇhi, bāvarimāṇavotissa nāmaṃ akaṃsu. So aparena samayena tayo vede uggaṇhitvā soḷasannaṃ māṇavakasahassānaṃ sippaṃ vācento carati. Athassa pasenadikosalarañño jātakāle pitu accayena purohitaṭṭhānaṃ adaṃsu. Tadā ayaṃpi mogharājamāṇavo bāvaribrāhmaṇassa santike sippaṃ gaṇhāti.