Atheko puriso jaṭilānaṃ dassanatthāya gato tesaṃ santike bhūmiṭṭhāne tehi anuññāte attano vasanaṭṭhānaṃ akāsi. Tena kataṃ disvā aparaṃ kulasataṃ gehasataṃ kāresi. Te sabbepi sannipatitvā "mayaṃ ayyānaṃ santike bhūmibhāge vasantā sukhaṃ vasituṃ na sakkoma, kahāpaṇaṃ sukhasaṃvāsaṃ te dassāmā"ti ekeko ekekaṃ kahāpaṇaṃ bāvaribrāhmaṇassa vasanaṭṭhāne ṭhapesi. Sabbepi āgatakahāpaṇā satasahassamattā ahesuṃ. Bāvaribrāhmaṇo "kimatthaṃ ete āgatā"ti āha. Sukhavāsanatthāya bhanteti. Sacāhaṃ hiraññasuvaṇṇena atthiko assaṃ, ahaṃ mahantaṃ dhanarāsiṃ pahāya na pabbajeyyaṃ. Tumhākaṃ kahāpaṇe gahetvā gacchathāti. Amhehi ayyassa pariccattaṃ na puna gaṇhāma, anusaṃvaccharaṃ pana eteneva niyāmena āharissāma, ime gahetvā ayyo dānaṃ detūti. Brāhmaṇo adhivāsetvā kapaṇaddhikavaṇibbakayācakānaṃ dānamukhe niyyādeti. Tassa aparāparaṃ dāyakabhāvo sakalajambūdīpe paññāyittha.

Tato kaliṅgaraṭṭhe dunnavitthe nāma gāme jūjakabrāhmaṇassa vaṃse jātabrāhmaṇassa brāhmaṇī uṭṭhāya samuṭṭhāya brāhmaṇaṃ codeti "bāvarī kira dānaṃ deti, gantvā tato hiraññasuvaṇṇaṃ āharā"ti. So tāya codiyamāno saṇṭhāretuṃ asakkonto bāvarissa santike gacchamāno bāvarimhi bhiyyo dānaṃ datvā paṇṇasālaṃ pavisitvā nipajjitvā dānaṃ anussaramāne gato. Gantvāva "dānaṃ me brāhmaṇa dehi, dānaṃ me brāhmaṇa dehī"ti āha. Akāle tvaṃ brāhmaṇa āgato, sampattayācakānaṃ me dinnaṃ, idāni kahāpaṇā natthīti. na mayhaṃ brāhmaṇa

@4 cha.Ma. santake 5 cha.Ma.,i. anuññāto 6 cha.,i. vasāma, mudhā vasituṃ na kāraṇaṃ,