Bāvaribrāhmaṇo cintesi "ayaṃ mahātapo tapacāraṃ gaṇhitvā caraṇakabrāhmaṇo mayhaṃ sattadivasamatthake `sattadhā muddhā phalatū'ti vadati, mayhañca imassa dātabbāni pañca kahāpaṇasatāni natthi, ekaṃsena maṃ esa ghātessatī"ti. Evaṃ tasmiṃ sokasallasamappite nisinne rattibhāgasamanantare anantarattabhāve bāvarissa mātā devatā hutvā nibbatti. Sā puttassa sokasallasamappitabhāvaṃ disvā āgantvā āha "tāta esa muddhaphālabhāvaṃ vā amuddhaphālabhāvaṃ vāpi na jānāti, tvaṃ loke buddhānaṃ uppannabhāvaṃ na jānāsi. Sace te saṃsayo atthi, satthu santikaṃ gantvā puccha, so te etaṃ kāraṇaṃ kathessatī"ti. Brāhmaṇo devatāya kathaṃ sutakālato paṭṭhāya assāsaṃ labhitvā punadivase uṭṭhite aruṇe sabbeva antevāsike pakkosāpetvā "tātā buddho kira loke uppanno, tumhepi sīghaṃ gantvā `buddho vā no vā'ti ñatvā āgantvā mayhaṃ ārocetha, ahaṃ satthu santikaṃ gamissāmi. Apica kho pana mayhaṃ mahallakabhāvena jīvitantarāyo dujjāno, tumhe tassa santikaṃ gantvā iminā ca iminā ca niyāmena pañhe naṃ pucchathā"ti muddhaphālanapañhaṃ nāma abhisaṅkharitvā adāsi.

Tato cintesi "sabbe ime māṇavā paṇḍitā, satthu dhammakathaṃ sutvā attano kicce matthakaṃ patte puna mayhaṃ santikaṃ āgaccheyyuṃ vā no vā"ti.

@phālemīti 5 Sī.,i. nibbattā 6 Sī.,i.,cha.Ma. muddhaṃ vā muddhaphālanaṃ vā