@7 cha.Ma.,i. pakkositvā Atha attano bhāgineyyassapi ajitamāṇavassa nāma saññaṃ adāsi "tvaṃ pana ekanteneva mama santikaṃ āgantuṃ arahasi, tayā paṭiladdhaṃ guṇaṃ āgantvā mayhaṃ katheyyāsī"ti. Atha te soḷasasahassajaṭilā ajitamāṇavaṃ jeṭṭhakaṃ katvā soḷasahi jeṭṭhantevāsikehi saddhiṃ "satthāraṃ pañhaṃ pucchissāmā"ti cārikaṃ carantā gatagataṭṭhāne "ayyā kahaṃ gacchatha kahaṃ gacchathā"ti pucchitā "dasabalassa santikaṃ pañhaṃ pucchituṃ gacchāmā"ti koṭito paṭṭhāya parisaṃ saṅkaḍḍhantā anekayojanasataṃ maggaṃ gatā. Satthā "tesaṃ āgamanadivase pana aññattha okāso na bhavissati, idaṃ imissā parisāya anucchavikaṭṭhānan"ti gantvā pāsāṇacetiye piṭṭhipāsāṇe nisīdi. So ajitamāṇavopi sapariso taṃ piṭṭhipāsāṇaṃ āruyha satthu sarīrasampattiṃ disvā "ayaṃ puriso imasmiṃ loke vivaṭacchado buddho bhavissatī"ti attano ācariyena pahite pañhe manasā pucchantova gato.

Taṃdivasaṃ tasmiṃ ṭhāne sampattaparisā dvādasayojanikā ahosi. Tesaṃ soḷasannaṃ antevāsikānaṃ antare mogharājamāṇavo "ahaṃ sabbehi paṇḍitataro"ti mānatthaddho, tassa etadahosi "ayaṃ ajitamāṇavo sabbesaṃ jeṭṭhako, etassa paṭhamataraṃ mama pañhaṃ pucchituṃ na yuttan"ti tassa lajjāyanto paṭhamataraṃ pañhaṃ apucchitvā tena pucchite dutiyo hutvā satthāraṃ pañhaṃ pucchi. Satthā "mānatthaddho mogharājamāṇavo, na ca tāvassa ñāṇaṃ paripākaṃ gacchati, assa mānaṃpi nīharituṃ vaṭṭatī"ti cintetvā āha "tiṭṭha tvaṃ mogharāja, aññe tāva pañhe pucchantū"ti. So satthu santikā apasādaṃ labhitvā cintesi "ahaṃ ettakaṃ kālaṃ mayā paṇḍitataro nāma natthīti vicarāmi, buddhā ca nāma mānasaṃ jānitvā na kathenti. Satthā apasādeti, satthārā mama pucchāya doso diṭṭho bhavissatī"ti tuṇhī ahosi. So aṭṭhahi janehi paṭipāṭiyā

@4 Sī.,i. pucchantāva gatā 5-5 Sī. yāvassa ñāṇaṃ paripākaṃ gacchati, athassa mānaṃ