@3 vi.cu. 7/402/231 bhikkhunikkhandhaka 4 Ma.u. 14/398/344 saḷāyatanavagga

Atīte kira padumuttarabuddhakāle haṃsavatīnagare ayaṃ parapariyāpannā hutvā nibbatti. Athekadivasaṃ tassa bhagavato aggasāvikaṃ sujātattheriṃ nāma piṇḍāya carantiṃ disvā tayo modake datvā taṃdivasameva attano gehe vissajjetvā theriyā dānaṃ datvā "anāgate buddhuppāde tumhe viya mahāpaññā bhaveyyan"ti paṭṭhanaṃ katvā yāvajīvaṃ kusalakammesu appamattā hutvā kappasatasahassaṃ devamanussesu saṃsarantī kassapabuddhakāle kiṃkissa rañño gehe paṭisandhiṃ gahetvā sattannaṃ bhaginīnaṃ abbhantarā hutvā vīsati vassasahassāni geheyeva komāribrahmacariyaṃ caritvā tāhi bhaginīhi saddhiṃ dasabalassa vasanapariveṇaṃ kāretvā ekaṃ buddhantaraṃ devamanussesu saṃsarantī imasmiṃ buddhuppāde maddaraṭṭhe sāgalanagare rājakule paṭisandhiṃ gaṇhi, khemātissā nāmaṃ akaṃsu. Tassā sarīravaṇṇo suvaṇṇarasapiñjaro viya ahosi. Sā pana vayappattā bimbisārarañño gehaṃ agamāsi.

Sā tathāgate rājagahaṃ upanissāya veḷuvane viharante "satthā kira rūpe dosaṃ dassetī"ti rūpamadamattā hutvā "mayhaṃpi rūpe dosaṃ dasseyyā"ti bhayena dasabalassa dassanāya na gacchati. Rājā cintesi "ahaṃ satthu aggupaṭṭhāko, mādisassa ca nāma ariyasāvakassa aggamahesī dasabalaṃ dassanāya na gacchati, na me etaṃ ruccatī"ti. So kavīhi veḷuvanuyyānassa vaṇṇaṃ bandhāpetvā "khemāya deviyā savanupacāre gāyathā"ti āha. Sā uyyānassa vaṇṇaṃ sutvā gantukāmā hutvā rājānaṃ paṭipucchi. Rājā "uyyānaṃ gaccha, satthāraṃ pana adisvā āgantuṃ na labhissasī"ti āha. Sā rañño paṭivacanaṃ adatvāva maggaṃ paṭipajji. Rājā tāya saddhiṃ gacchante purise āha "sace devī uyyānato nivattamānā dasabalaṃ passati, iccetaṃ kusalaṃ. Sace na passati, rājāṇāya naṃ dassethā"ti. Athakho sā devī divasabhāgaṃ uyyāne caritvā nivattantī dasabalaṃ adisvāva gantuṃ āraddhā. Atha naṃ rājapurisā attano aruciyā deviṃ satthu santikaṃ nayiṃsu.