@10 Sī.,i.,cha. iṅgiteneva, Ma. ekadesañāṇena 11 Sī.,i. ariyadhammaṃ arahattaṃ Pattā bhavissatī"ti. Atha naṃ āha "devī gatā nu kho satthu dassanāyā"ti. Mahārāja tumhehi diṭṭhadassanaṃ caritaṃ, ahaṃ pana dasabalaṃ sudiṭṭhaṃ akāsiṃ, pabbajjaṃ me anujānāthāti. Rājā "sādhu devī"ti sampaṭicchitvā suvaṇṇasivikāya bhikkhunīupassayaṃ upanetvā pabbājesi, athassā "khemātherī nāma gihibhāve ṭhatvā arahattaṃ pattā"ti mahāpaññābhāvo pākaṭo ahosīti. Idametthapi vatthuṃ. Atha satthā aparabhāge jetavane nisinno bhikkhuniyo paṭipāṭiyā ṭhānantaresu ṭhapento khemātheriṃ mahāpaññānaṃ aggaṭṭhāne ṭhapesīti.

Uppalavaṇṇātherīvatthu

[237] Tatiye uppalavaṇṇāti nīluppalagabbhasadisena vaṇṇena samannāgatattā evaṃladdhanāmā therī. Sā kira padumuttarabuddhakāle haṃsavatiyaṃ kulagehe paṭisandhiṃ gaṇhitvā aparabhāge mahājanena saddhiṃ satthu santikaṃ gantvā dhammaṃ suṇantī satthāraṃ ekaṃ bhikkhuniṃ iddhimantānaṃ aggaṭṭhāne ṭhapentaṃ disvā sattāhaṃ buddhappamukhassa bhikkhusaṃghassa mahādānaṃ datvā taṃ ṭhānantaraṃ paṭṭhesi. Sā yāvajīvaṃ kusalaṃ katvā devamanussesu saṃsarantī kassapabuddhakāle bārāṇasinagare kiṃkissa rañño gehe paṭisandhiṃ gaṇhitvā sattannaṃ bhaginīnaṃ abbhantarā hutvā vīsati vassasahassāni brahmacariyaṃ caritvā bhikkhusaṃghassa pariveṇaṃ katvā devaloke nibbattā.

Tato cavitvā puna manussalokaṃ gacchantī ekasmiṃ gāmake sahatthā kammaṃ katvā jīvanakaṭṭhāne nibbattā. Sā ekadivasaṃ khettakuṭiṃ gacchantī antarāmagge ekasmiṃ sare pātova pupphitaṃ padumapupphaṃ disvā taṃ saraṃ oruyha tañceva pupphaṃ lājapakkhipanatthāya paduminiyā pattañca gahetvā kedāre sālisīsāni chinditvā kuṭiyaṃ nisinnā lāje bhajjitvā pañca lājasatāni gaṇesi. Tasmiṃ khaṇe