@4 cha.Ma. idamettha vatthu 5 cha.Ma. nīluppalagabbhasadiseneva 6 cha.Ma. iddhimantīnaṃ

@7 cha.Ma.,i. āgacchantī 8 cha.Ma.,i. gāme 9 cha.Ma.,i. kuṭikāya Gandhamādanapabbate nirodhasamāpattito vuṭṭhito eko paccekabuddho āgantvā tassā avidūre aṭṭhāsi. Sā pacajacekabuddhaṃ disvā lājehi saddhiṃ padumapupphaṃ gahetvā kuṭito oruyha lāje paccekabuddhassa patte khipitvā padumapupphena pattaṃ pidhāya adāsi. Athassā paccekabuddhe thokaṃ gate etadahosi "pabbajitā nāma pupphena anatthikā, ahaṃ pupphaṃ gahetvā pilandhissāmī"ti gantvā paccekabuddhassa hatthato pupphaṃ gahetvā puna cintesi "sace ayyo pupphena anatthiko abhavissa, taṃ pattamatthake ṭhapituṃ na adāsi, addhā ayyassa attho bhavissatī"ti puna gantvā pattamatthake ṭhapetvā paccekabuddhaṃ khamāpetvā "bhante imesaṃ me lājānaṃ nissandena lājagaṇanāya puttā assu, padumapupphanissandena nibbattaṭṭhāne me pade pade padumapupphaṃ uṭṭhahatū"ti paṭṭhanaṃ akāsi. Paccekabuddho tassā passantiyāva ākāsena gandhamādanapabbataṃ gantvā taṃ padumaṃ nandamūlakapabbhāre paccekabuddhānaṃ akkamanasopānasamīpe pādapuñchanaṃ katvā ṭhapesi.

Sāpi tassa kammassa nissandena devaloke paṭisandhiṃ gaṇhi, nibbattakālato paṭṭhāya cassā pade pade mahāpadumapupphaṃ uṭṭhāsi. Sā tato cavitvā pabbatapāde ekasmiṃ padumasare padumagabbhe nibbatti. Taṃ nissāya eko tāpaso vasati, so pātova mukhadhovanatthāya saraṃ gantvā taṃ pupphaṃ disvā cintesi "idaṃ pupphaṃ sesehi mahantataraṃ, sesāni ca pupphitāni, idaṃ makulitameva, bhavitabbamettha kāraṇenā"ti udakaṃ otaritvā taṃ pupphaṃ gaṇhi. Taṃ tena gahitamattameva pupphitaṃ. Tāpaso antopadumagabbhe nipannadārikaṃ addasa. Diṭṭhakālato paṭṭhāya ca dhītusinehaṃ labhitvā padumeneva saddhiṃ paṇṇasālaṃ netvā mañcake nipajjāpesi. Athassā puññānubhāvena aṅguṭṭhake khīraṃ nibbatti. So tasmiṃ pupphe milāte aññaṃ navapupphaṃ āharitvā taṃ nipajjāpesi. Athassā ādhāvanavidhāvanavasena kīḷituṃ samatthakālato paṭṭhāya pade pade padumapupphaṃ