@3 Ma. ādhāvanaparidhāvanena, cha. ādhāvanavidhāvanena 4 cha.Ma. padavāre padavāre Uṭṭhāsi, kuṅkumarāsissa viyassā sarīravaṇṇā ahosi. Sā appattā devavaṇṇaṃ, atikkantā manussavaṇṇaṃ ahosi. Sā pitari phalāphalatthāya gate paṇṇasālāya ohiyati.

Athekadivasaṃ tassā vayappattakāle pitari phalāphalatthāya gate eko vanacarako taṃ disvā cintesi "manussānaṃ nāma evaṃvidhaṃ rūpaṃ natthi, vīmaṃsissāmi nan"ti tāpasassa āgamanaṃ udikkhanto nisīdi. Sā pitari āgacchante paṭipathaṃ gantvā tassa hatthato kājekamaṇḍaluṃ aggahesi, sayaṃ āgantvā nisinnassa tāpasassa attano karaṇavattaṃ dassesi. Tadā so vanacarako manussabhāvaṃ ñatvā tāpasaṃ abhivādetvā nisīdi. Tāpaso taṃ vanacarakaṃ vanamūlaphalāphalehi ca pānīyena ca nimantetvā "bho purisa imasmiṃyeva ṭhāne vasissasi, udāhu gamissasī"ti pucchi. Gamissāmi bhante, idha kiṃ karissāmīti. Idaṃ tayā diṭṭhakāraṇaṃ ettha gantvā akathetuṃ sakkhissasīti. Sace ayyo na icchati, kiṃkāraṇā kathessāmīti tāpasaṃ vanditvā puna āgamanakāle maggasañjānanatthaṃ sākhañca padañca rukkhasaññañca karonto pakkāmi.

So bārāṇasiṃ gantvā rājānaṃ addasa, rājā "kasmā āgatosī"ti pucchati. "ahaṃ deva tumhākaṃ vanacarako pabbatapāde acchariyaṃ itthīratanaṃ disvā āgatomhī"ti sabbaṃ pavuttiṃ kathesi. So tassa vacanaṃ sutvā vegena pabbatapādaṃ gantvā avidūre ṭhāne khandhāvāraṃ nivesetvā vanacarakena ceva aññehi ca purisehi saddhiṃ tāpasassa bhattakiccaṃ katvā nisinnavelāya tattha gantvā abhivādetvā paṭisaṇṭhāraṃ katvā ekamantaṃ nisīdi. Rājā tāpasassa pabbajitaparikkhārabhaṇḍaṃ pādamūle ṭhapetvā "bhante imasmiṃ ṭhāne kiṃ karoma, gacchāmā"ti āha. Gaccha mahārājāti. Āma gacchāmi bhante, ayyassa pana samīpe visabhāgaparisā atthīti assumhā, papañcā esā pabbajitānaṃ, mayā saddhiṃ gacchatu bhanteti. Manussānaṃ nāma cittaṃ duṭṭhaṃ, ayaṃ