@4 Sī.,i. dūbhikā 5 Ma. sakalanagare 6 Sī.,i. bherivādakaṃ 7 cha.Ma.,i. carāpethāti

Atha aparabhāge tesaṃ kumārānaṃ kīḷanakāle sampatte rājā uyyāne nānāvidhaṃ kīḷanaṭṭhānaṃ kāresi. Te attano soḷasavassuddesikakāle sabbeva ekato hutvā uyyāne padumasañchannāya maṅgalapokkharaṇiyā kīḷantā navapadumāni pupphitāni purāṇapadumāni ca vaṇṭato patantāni disvā "imassa tāva anupādinnakassa evarūpā jarā pāpuṇāti, kimaṅgaṃ pana amhākaṃ sarīrassa. Idaṃpi hi evaṃgatikameva bhavissatī"ti ārammaṇaṃ gahetvā sabbeva paccekabuddhañāṇaṃ nibbattetvā uṭṭhāyuṭṭhāya padumakaṇṇikāsu pallaṅkena nisīdiṃsu.

Atha tehi saddhiṃ āgatapurisā bahutaraṃ divasaṃ ñatvā "ayyaputtā tumhākaṃ velaṃ jānāthā"ti āhaṃsu. Te sabbe tuṇhī ahesuṃ. Te purisā gantvā rañño ārocesuṃ "kumārā deva padumakaṇṇikāsu nisinnā, amhesu kathentesupi vacībhedaṃ na karontī"ti. Yathāruciyā tesaṃ nisīdituṃ dethāti. Te sabbarattiṃ gahitārakkhā padumakaṇṇikāsu nisinnaniyāmeneva aruṇaṃ uṭṭhāpesuṃ. Purisā gantvā punadivase upasaṅkamitvā "devā velā jānāthā"ti. Na mayaṃ devā, paccekabuddhā nāma mayanti. Ayyā tumhe bhāriyaṃ kathaṃ kathetha, paccekabuddhā nāma tumhādisā na honti, dvaṅgulikesamassudharā kāye paṭimukkaaṭṭhaparikkhārā hontīti. Te dakkhiṇahatthena sīsaṃ parāmasiṃsu, tāvadeva gihiliṅgaṃ antaradhāyi, aṭṭhaparikkhārā kāyapaṭimukkāva ahesuṃ. Tato passantasseva mahājanassa ākāseneva nandamūlakapabbhāraṃ agamaṃsu.