Nimantitapaccekabuddhā sesānaṃ saññaṃ adaṃsu "mārisā ajja aññattha agantvā sabbeva tumhākaṃ mātu saṅgahaṃ karothā"ti. Tesaṃ vacanaṃ sutvā sabbeva ekato ākāsena gantvā mātu gehadvāre pāturahesuṃ. Sāpi paṭhamaṃ laddhasaññāya bahū disvā na kampittha, sabbepi gehaṃ pavesetvā āsane nisīdāpesi. Tesu paṭipāṭiyā nisīdantesu navamo aññāni aṭṭha āsanāni māpetvā sayaṃ dhurāsane nisīdi. Yāva āsanāni vaḍḍhanti, tāva gehaṃ vaḍḍhati. Evaṃ tesu sabbesu nisinnesu sā itthī aṭṭhannaṃ paccekabuddhānaṃ paṭiyāditasakkāraṃ pañcasatānaṃpi yāvadatthaṃ datvā aṭṭha nīluppalahatthake āharitvā nimantitānaṃ paccekabuddhānaṃyeva pādamūle ṭhapetvā āha "mayhaṃ bhante nibbattanibbattaṭṭhāne sarīravaṇṇo imesaṃ nīluppalānaṃ antogabbhavaṇṇo viya hotū"ti paṭṭhanaṃ akāsi. Paccekabuddhā mātu anumodanaṃ katvā gandhamādanaṃyeva agamaṃsu.

Sāpi yāvajīvaṃ kusalaṃ katvā tato cutā devaloke nibbattitvā imasmiṃ buddhuppāde sāvatthiyaṃ seṭṭhikule paṭisandhiṃ gaṇhi, nīluppalasamānavaṇṇatāya cassā uppalavaṇṇātveva nāmaṃ akaṃsu. Athassā vayappattakāle sakalajambūdīparājānova seṭṭhissa santikaṃ pahiṇiṃsu "dhītaraṃ amhākaṃ detū"ti. Apahiṇanto nāma nāhosi.

@3 cha.Ma. pasādeyyāsīti 4 cha.Ma.,i. laddhasaññatāya