@i. mahāmeghā vuṭṭhahiṃsu 6 Sī.,i. anovassakaṭṭhānaṃ Padānusārena olokentī vammikapāde patitaṃ disvā "maṃ nissāya naṭṭho puriso"ti paridevitvā daharadārakaṃ passenādāya mahallakaṃ aṅguliṃ gāhāpetvā maggena gacchantī antarāmagge ekaṃ uttānanadiṃ disvā "dvepi dārake ekappahāreneva ādāya gantuṃ na sakkhissāmī"ti jeṭṭhakaṃ orimatīre ṭhapetvā daharaṃ dārakaṃ paratīraṃ netvā pilotikacumbiṭake nipajjāpetvā puna nivattitvā "imaṃ gahetvā gamissāmī"ti nadiṃ otari.

Athassā nadīmajjhaṃ pattakāle eko seno "maṃsapiṇḍo ayan"ti saññāya dārakaṃ gaṇhitvā āgacchati. Sā hatthaṃ pasāretvā senaṃ palāpesi. Tassā taṃ hatthavikāraṃ disvā mahallakadārako "maṃ pakkosatī"ti saññāya nadiṃ otaritvā sote patito yathāsotaṃ agamāsi. Sopi seno tassā asampattāyaeva taṃ daharadārakaṃ gaṇhitvā agamāsi. Sā balavasokābhibhūtā antarāmagge imaṃ vilāpaṃ gītakaṃ gāyantī gacchati:-

"ubho puttā kālakatā panthe mayhaṃ patī mato"ti.

Sā evaṃ vilapamānā sāvatthiṃ patvā kulasabhāgaṃ gantvāpi sokavaseneva attano gehaṃ vavatthapetuṃ asakkontī "imasmiṃ ṭhāne evaṃvidhaṃ nāma kulaṃ atthi, kataraṃ taṃ gehan"ti paṭipucchi. Tvaṃ taṃ kulaṃ paṭipucchitvā kiṃ karissasi, tesaṃ vasanagehaṃ vātappahārena patitaṃ, tattheva te sabbepi jīvitakkhayaṃ pattā, atha ne khuddakamahallake ekacittakasmiṃyeva jhāpenti, passa esā dhūmavaṭṭi paññāyatīti. Sā taṃ kathaṃ sutvāva "kiṃ tumhe vadathā"ti attano nivaṭṭhasāṭakaṃ sandhāretuṃ asakkontī jātiniyāmeneva bāhā paggayha kandamānā ñātīnaṃ citakaṭṭhānaṃ gantvā taṃ vilāpagītaṃ paripuṇṇaṃ katvā paridevamānā:-