mātā pitā ca bhātā ca ekacitakasmiṃ ḍayhare"ti āha. Aññena janena sāṭakaṃ dinnaṃpi phāletvā chaḍḍeti. Atha naṃ diṭṭhadiṭṭhaṭṭhāne mahājano parivāretvā vicarati. Athassā "ayaṃ paṭācārā paṭavicāraṇaṃ vinā vicaratī"ti paṭācārātveva nāmaṃ akaṃsu. Yasmā panassā naggabhāvena alajjīva ācāro pākaṭo ahosi, tasmā patito ācāro assāti paṭācārātveva nāmaṃ akaṃsu.

Sā ekadivasaṃ satthari mahājanassa dhammaṃ desente vihāraṃ pavisitvā parisapariyante aṭṭhāsi. Satthā mettāya pharitvā "satiṃ paṭilabha bhagini satiṃ paṭilabha bhaginī"ti āha. Tassā satthu vacanaṃ sutvā balavahirottappaṃ āgataṃ, sā tattheva bhūmiyaṃ nisīdi. Avidūre ṭhito puriso uttarisāṭakaṃ khipitvā adāsi, sā taṃ nivāsetvā dhammaṃ assosi. Satthā tassā cariyavasena imā dhammapade gāthā āha:-

"na santi puttā tāṇāya na pitā nāpi bandhavā

antakenādhipannassa natthi ñātīsu tāṇatā.