Sā pabbajitvā cintesi "ayaṃ tāva seṭṭhī gharamajjhe ṭhitova dukkhassa antaṃ akāsi, pabbajjaṃ laddhakālato paṭṭhāya pana mayāpi dukkhassantaṃ kātuṃ vaṭṭatī"ti ācariyupajjhāyānaṃ santikaṃ gantvā "ayye mayhaṃ āciṇṇaṭṭhāne cittaṃ namati, gāmakāvāsaṃ gacchāmī"ti āha. Theriyo tassā mahākulā nikkhamma pabbajitabhāvena cittaṃ kopetuṃ asakkontiyo taṃ gahetvā gāmakāvāsaṃ agamaṃsu. Sā atīte madditasaṅkhāratāya nacirasseva saha paṭisambhidāhi arahattaṃ pāpuṇi. Athassā etadahosi "mayhaṃ kiccaṃ matthakaṃ pattaṃ, idha vasitvā kiṃ karissāmi, rājagahameva gacchāmi, tattha maṃ nissāya bahu ñātisaṅgho puññāni karissatī"ti theriyo gahetvā nagarameva paccāgatā.

Visākho tassā āgatabhāvaṃ ñatvā "sīghaṃ āgatā ukkaṇṭhitā nu kho bhavissatī"ti sāyaṇhasamaye tassā santikaṃ gantvā abhivādetvā ekamantaṃ nisinno "ukkaṇṭhitabhāvaṃ pucchituṃ ayuttan"ti pañcakkhandhādivasena pañhe pucchi, dhammadinnā khaggena uppalanālaṃ chindantī viya pucchitaṃ pucchitaṃ vissajjesi. Upāsako dhammadinnātheriyā ñāṇasūrabhāvaṃ ñatvā attano adhigataṭṭhāne paṭipāṭiyā tīsu maggesu sabbākārena pañhe pucchitvā uggahavasena arahattamaggepi pucchi. Dhammadinnā therīpi upāsakassa yāva anāgāmiphalāva visayabhāvaṃ ñatvā "idāni attano visayaṃ atikkamitvā dhāvatī"ti

@4 cha.Ma. vāretuṃ 5 Sī.,i. majjitasaṅkhāratāya Taṃ nivattentī "tvaṃ āvuso visākha nāsakkhi pañhānaṃ pariyantaṃ gahetuṃ, nibbānogadhañahi āvuso visākha brahmacariyaṃ nibbānaparāyanaṃ nibbānapariyosānaṃ. Ākaṅkhamāno ca tvaṃ āvuso visākha bhagavantaṃ upasaṅkamitvā etamatthaṃ puccheyyāsi. Yathā ca te bhagavā byākaroti, tathā naṃ dhāreyyāsī"ti āha.