Visākho satthu santikaṃ gantvā sabbaṃ pucchāvissajjanānayaṃ kathesi. Satthā tassa vacanaṃ sutvā "mama dhītāya atītānāgatapaccuppannesu khandhesu taṇhā natthī"ti vatvā dhammapade imaṃ gāthamāha:-

"yassa pure ca pacchā ca majjhe ca natthi kiñcanaṃ

akiñcanaṃ anādānaṃ tamahaṃ brūmi brāhmaṇan"ti.

Tato dhammadinnāya sādhukāraṃ datvā visākhaṃ upāsakaṃ etadavoca "paṇḍitā visākha dhammadinnā bhikkhunī, mahāpaññā visākha dhammadinnā bhikkhunī. Sacepi tvaṃ visākha etamatthaṃ puccheyyāsi, ahaṃpi etamatthaṃ byākareyyāmi, yathā taṃ dhammadinnāya bhikkhuniyā byākataṃ, eso ceva tassa attho, evañca naṃ dhārehī"ti. Evametaṃ vatthu samuṭṭhitaṃ. Aparabhāge satthā jetavane viharanto paṭipāṭiyā bhikkhuniyo ṭhānantaresu ṭhapento imameva cūḷavedallaṃ atthuppattiṃ katvā theriṃ imasmiṃ sāsane dhammakathikānaṃ aggaṭṭhāne ṭhapesīti.