Soṇātherīvatthu

[241] Sattame āraddhaviriyānaṃ yadidaṃ soṇāti paggahitaparipuṇṇaviriyānaṃ soṇā aggāti dasseti. Ayaṃ kira padumuttarabuddhakāle haṃsavatiyaṃ kulagehe paṭisandhiṃ gahetvā aparabhāge dhammaṃ suṇantī satthāraṃ ekaṃ bhikkhuniṃ āraddhaviriyānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi. Sā kappasatasahassaṃ devamanussesu saṃsaritvā imasmiṃ buddhuppāde sāvatthiyaṃ kulagehe paṭisandhiṃ gahetvā aparabhāge gharāvāse vuṭṭhā bahū puttadhītaro labhitvā sabbepi visuṃ visuṃ gharāvāse patiṭṭhāpesi. Te tato paṭṭhāya "ayaṃ amhākaṃ kiṃ karissatī"ti taṃ attano santikaṃ āgataṃ "mātā"ti saññaṃpi na kariṃsu. Bahuputtikasoṇā tesaṃ attani agāravaṃ ñatvā "gharāvāsena kiṃ karissāmī"ti nikkhamitvā pabbaji. Atha naṃ bhikkhuniyo "ayaṃ vattaṃ na jānāti, ayuttaṃ karotī"ti daṇḍakammaṃ karonti. Puttadhītaro taṃ daṇḍakammaṃ āharantiṃ disvā "ayaṃ yāvajjadivasā sikkhāmattaṃpi na jānātī"ti diṭṭhadiṭṭhaṭṭhāne upphaṇḍenti. Sā tesaṃ vacanaṃ sutvā uppannasaṃvegā "attano gativisodhanaṃ kātuṃ vaṭṭatī"ti nisinnaṭṭhānepi ṭhitaṭṭhānepi dvattiṃsākāraṃ sajjhāyati. Sā yatheva pubbe bahuputtikasoṇattherīti paññāyittha, evaṃ pacchā āraddhaviriyasoṇattherīti pākaṭā jātā.

@4 Sī.,i. mattaṃ 5 Sī.,i. sikkhāpadamattampi 6 Sī.,i. ujjhāyanti,