Gāthāpariyosāne arahattaṃ patvā cintesi "ahaṃ arahattaṃ pattā, āgantukajano anupadhāretvāva mayi avamaññāya kiñci vatvā bahuṃ pāpaṃ pasaveyya, tasmā sallakkhaṇakāraṇaṃ kātuṃ vaṭṭatī"ti. Sā udakabhājanaṃ āropetvā heṭṭhā aggiṃ na akāsi. Bhikkhuniyo āgantvā uddhanaṃ olokentiyo aggiṃ adisvā "imaṃ mahallikaṃ `bhikkha- nīsaṃghassa udakaṃ tāpehī'ti avocumhā, ajjāpi uddhane aggiṃpi na karotī"ti āhaṃsu. Ayye kiṃ tumhākaṃ agginā, uṇhodakena nhāyitukāmā bhājanato udakaṃ gahetvā nhāyathāti. Tāpi "bhavissati ettha kāraṇan"ti gantvā udake hatthaṃ otāretvā uṇhabhāvaṃ ñatvā ekaṃ kuṭaṃ āharitvā udakaṃ gaṇhanti, gahitagahitaṭṭhānaṃ pūrati. Tadā sabbāva tassā arahatte ṭhitabhāvaṃ ñatvā daharatarā tāva pañcapatiṭṭhitena pādesu patitvā "ayye ettakaṃ kālaṃ tumhe anupadhāretvā viheṭhetvā viheṭhetvā kathayimhā, khamatha no"ti khamāpesuṃ. Vuḍḍhatarāpi therī ukkuṭikaṃ nisīditvā "khamatha ayye"ti khamāpesuṃ. Tato paṭṭhāya "mahallakakāle pabbajitvāpi āraddhaviriyabhāvena nacirasseva aggaphale patiṭṭhitā"ti theriyā guṇo pākaṭo ahosi. Aparabhāge satthā jetavane nisīditvā bhikkhuniyo paṭipāṭiyā ṭhānantaresu ṭhapento soṇattheriṃ āraddhaviriyānaṃ aggaṭṭhāne ṭhapesīti.

@4 Sī.,i. tassa 5 cha.Ma.,i. paripūrati 6 i. gantvā 7 cha.Ma.,i. ayaṃ pāṭho na

@dissati 8 cha.Ma.,i. ṭhānantare. evamuparipi