Tasmiṃ samaye ayaṃ bhaddā nāma seṭṭhidhītā mahājanassa kolāhalasaddena sīhapañjaraṃ ugghāṭetvā olokentī taṃ sattukaṃ coraṃ vadhatthāya nīyamānaṃ disvā ubhohi hatthehi hadayaṃ sandhārentī gantvā sirisayane adhomukhā nipajji. Sā ca tassa kulassa ekadhītā, tenassā ñātakā appamattakaṃpi mukhavikāraṃ sahituṃ na sakkonti. Atha naṃ mātā taṃ sayane nipannaṃ disvā "kiṃ karosi ammā"ti pucchi. Etaṃ vajjhaṃ katvā nīyamānaṃ coraṃ addasaṃ ammāti etaṃ labhamānā jīvissāmi, alabhamānāya me maraṇameva varanti. Te taṃ nānappakārenapi saññāpetuṃ asakkontā "maraṇā jīvitaṃ seyyo"ti sallakkhesuṃ. Athassā pitā nagaraguttikassa santikaṃ gantvā sahassalañcaṃ datvā "mayhaṃ dhītā core paṭibaddhacittā, yena kenaci upāyena imaṃ muñcā"ti āha. So "sādhū"ti seṭṭhissa paṭissuṇitvā coraṃ gahetvā yāva suriyassa atthaṅgamā ito cito ca papañcāpetvā suriye atthaṃ upagate corabhāvaṃ katvā ekaṃ corakaṃ corakato nīharāpetvā sattukaṃ bandhanā mocetvā sattukaṃ seṭṭhigehaṃ pesetvā tena bandhanena itaraṃ bandhitvā dakkhiṇadvārena nīharitvā ghātesi. Seṭṭhidāsāpi sattukaṃ gahetvā seṭṭhino nivesanaṃ āgamiṃsu. Taṃ disvā seṭṭhī "dhītu manaṃ pūressāmī"ti sattukaṃ gandhodakena nhāpetvā sabbābharaṇapaṭimaṇḍitaṃ kāretvā pāsādaṃ pesesi.

@cha. cāretvā 4 cha.Ma.,i. gahetvā 5 Sī.,i. kalakalasaddena 6 cha.Ma.,i. tathā

@7 cha.Ma.,i. ayaṃ pāṭho na dissati 8 Sī.,i. pucchiṃsu 9 Sī.,i. āma amma