Sattuko katipāhaṃ vītināmetvā cintesi "imissā pasādhanabhaṇḍakaṃ mayhaṃ bhavissati, kenaci upāyena imaṃ ābharaṇaṃ gahetuṃ vaṭṭatī"ti samīpe sukhena nisinnakāle bhaddamāha "mayhaṃ ekaṃ vacanaṃ vattabbaṃ atthī"ti. Seṭṭhidhītā sahassalābhaṃ labhitvā viya tuṭṭhamānasā "vissaṭṭhaṃ vada ayyā"ti āha. Tvaṃ cintesi "maṃ nissāya iminā jīvitaṃ laddhan"ti, ahaṃ pana gahitamattova corapapātapabbate adhivatthāya devatāya "sacāhaṃ jīvitaṃ labhissāmi, balikammaṃ vo dassāmī"ti āyāciṃ. Taṃ nissāya mayā jīvitaṃ laddhaṃ, sīghaṃ balikammaṃ sajjāpehīti. Bhaddā "ahaṃ tassa manaṃ pūressāmī"ti balikammaṃ sajjāpetvā sabbaṃ pasādhanaṃ pasādhetvā ekayāne āruyha sāmikena saddhiṃ corapapātaṃ gantvā "pabbatadevatāya balikammaṃ karissāmī"ti abhiruhituṃ āraddhā. Sattuko cintesi "sabbesu abhiruhantesu mama imissā ābharaṇaṃ gahetvā na okāso bhavissatī"ti tameva balibhājanaṃ gāhāpetvā pabbataṃ abhiruhi.

So bhaddāya saddhiṃ kathento piyakathaṃ na katheti. Sā teneva corassa adhippāyaṃ aññāsi. Atha naṃ so āha "bhadde tava sāṭakaṃ omuñcitvā kāyāruḷhaṃ te pasādhanaṃ ettha bhaṇḍikaṃ karohī"ti. Sāmi mayhaṃ ko aparādhoti. Kiṃ panāhaṃ bāle balikammatthaṃ āgatoti saññaṃ karosi. Ahañhi imissā devatāya yakanaṃ ubbaṭṭetvā dadeyyaṃ, balikammāpadesena pana tava ābharaṇaṃ gaṇhitukāmo hutvā āgatomhīti. Kassa pana ayya pasādhanaṃ, kassa ahanti. Mayaṃ evarūpaṃ na jānāma, aññaṃ tava santakaṃ, aññaṃ mama santakanti. Sādhu ayya, ekaṃ pana me adhippāyaṃ pūretha, alaṅkataniyāmeneva me purato ca pacchato ca āliṅgituṃ dethāti. So "sādhū"ti sampaṭicchi. Sā tena sampaṭicchitabhāvaṃ ñatvā purato āliṅgitvā pacchato āliṅgantī viya

@4 cha.Ma.,i. gahetuṃ 5 ka. kathento viya kathaṃ kathesi 6 cha.Ma.,i. iṅgiteneva tassa