itthīpi paṇḍitā hoti muhuttamapi cintaye"ti.

Tato bhaddā cintesi "na sakkā mayā iminā niyāmena puna gehaṃ gantuṃ, ito gantvā ekaṃ pabbajjaṃ pabbajissāmī"ti nigaṇṭhārāmaṃ gantvā nigaṇṭhe pabbajjaṃ yāci. Atha naṃ te āhaṃsu "kena niyāmena pabbajjā hotū"ti. Yaṃ tumhākaṃ pabbajjāya uttamaṃ, tadeva karothāti. Te "sādhū"ti tassā tālaṭṭhinā kese luñcitvā pabbājesuṃ. Kesā puna vaḍḍhantāpi rāsivasena kuṇḍalāvattā hutvā vaḍḍhiṃsu. Sā teneva kāraṇena kuṇaḍalakesā nāma jātā. Sā attano pabbajitaṭṭhāne sabbaṃ sippaṃ uggaṇhitvā "tesaṃ ito uttariṃ viseso natthī"ti ñatvā gāmanigamarājadhāniyo vicarantī yattha yattha paṇḍitā atthi, tattha tattha gantvā tesaṃ jānanasippaṃ sabbameva uggaṇhāti. Athassā bahūsu ṭhānesu sikkhitabhāvena paṭivādaṃ dātuṃ samatthā na honti. Sā attanā saddhiṃ kathetuṃ samatthaṃ adisvā yaṃ gāmaṃ vā nigamaṃ vā pavisati, tassa dvāre vālukarāsiṃ katvā tattheva jambūsākhaṃ ṭhapesi. "yo mama vādaṃ āropetuṃ sakkoti, so imaṃ sākhaṃ maddatū"ti samīpe ṭhitānaṃ dārakānaṃ saññaṃ deti. Taṃ sattāhaṃpi maddantā na honti. Atha naṃ gahetvā pakkamati.

@3 ka. uggaṇhi 4 cha.Ma. uttari 5 cha.Ma.,i. ṭhapeti