Tasmiṃ samaye amhākaṃ bhagavā loke nibbattitvā sāvatthiṃ upanissāya jetavane viharati. Kuṇḍalakesāpi kho anupubbena sāvatthiṃ patvā antonagare pavisamānā porāṇaniyāmeneva vālukarāsimhi sākhaṃ ṭhapetvā dārakānaṃ saññaṃ datvā pāvisi. Tasmiṃ samaye dhammasenāpati bhikkhusaṃghe paviṭṭhe ekakova nagaraṃ pavisanto vālukathūpe jambūsākhaṃ disvā "kasmā ayaṃ ṭhapitā"ti pucchi. Dārakā naṃ aparihāpetvā kathesuṃ. Evaṃ sante imaṃ gahetvā maddatha dārakāti. Tesu therassa vacanaṃ sutvā ekacce maddituṃ na visahiṃsu, ekacce taṃkhaṇaṃyeva madditvā cuṇṇavicuṇṇaṃ akaṃsu. Kuṇḍalakesā bhattakiccaṃ katvā nikkhamantī taṃ sākhaṃ madditaṃ disvā "kassetaṃ kamman"ti pucchi. Athassā dhammasenāpatinā kārāpitabhāvaṃ kathayiṃsu. Sā "attano thāmaṃ ajānanto imaṃ sākhaṃ maddāpetuṃ no visahissati, addhā eso mahanto bhavissati. Ahaṃpi pana khuddikā bhavantī na sobhissāmi, antogāmameva pavisitvā parisāya saññaṃ dātuṃ vaṭṭatī"ti cintetvā tathā akāsi. Asītikulasahassanivāse nagare sabhāgavasena sabbe sañjāniṃsūti veditabbaṃ.
Theropi bhattakiccaṃ katvā aññatarasmiṃ rukkhamūle nisīdi. Athāyaṃ kuṇḍalakesā mahājanaparivutā therassa santikaṃ gantvā paṭisaṇṭhāraṃ katvā ekamantaṃ ṭhatvā "bhante tumhehi sākhā maddāpitā"ti pucchi. Āma mayā maddāpitāti. Evaṃ sante tumhehi saddhiṃ amhākaṃ vādo hotu bhanteti. Hotu bhaddeti. Kassa pucchā hotu kassa vissajjananti. Pucchā nāma amhākaṃ pattā, tvaṃ pana tuyhaṃ jānanakaṃ pucchāti. Sā therena dinnaanumatiyā sabbameva attano jānanakaṃ vādaṃ pucchi, thero sabbaṃ vissajjesi. Sā sabbaṃ pucchitvā tuṇhī ahosi. Atha naṃ thero āha "tayā bahuṃ pucchitaṃ, mayaṃpi ekaṃ pañhaṃ pucchāmā"ti. Pucchatha bhanteti. Ekaṃ nāma kinti. Kuṇḍalakesā "na jānāmi bhante"ti āha. Tvaṃ ettakaṃpi na jānāsi,
@3 Sī.,i.,cha.Ma. dārakā taṃ kāraṇaṃ 4 Sī.,i. jāniṃsūti 5 Sī.,i. hoti 6 cha.Ma. bahu Aññaṃ kiṃ jānissasīti. Sā therassa pādesu patitvā "tumhākaṃ saraṇaṃ gacchāmi bhante"ti āha. Mama saraṇagamanakammaṃ natthi, sadevake loke aggapuggalo dhuravihāre vasati, taṃ saraṇaṃ gacchāhīti. Sā "evaṃ karissāmi bhante"ti sāyaṇhasamaye satthu dhammadesanāvelāya satthu santikaṃ gantvā pañca- patiṭṭhitena vanditvā ekamantaṃ aṭṭhāsi. Satthā tassā madditasaṅkhārāya cariyavasena dhammapade imaṃ gāthamāha:-