Bhaddākaccānātherīvatthu

[245] Ekādasame mahābhiññāppattānanti mahatiyo abhiññāyo pattānaṃ bhaddākaccānā nāma aggāti dasseti. Ekassa hi buddhassa cattārova janā mahābhiññā honti, na avasesasāvakā. Avasesasāvakā hi kappasatasahassameva anussarituṃ sakkonti, na tato paraṃ. Mahābhiññāppattā pana kappasatasahassādhikaṃ asaṅkhyeyyaṃ anussaranti. Amhākaṃpi satthu sāsane dve aggasāvakā bākulatthero bhaddākaccānāti ime cattāro ettakaṃ anussarituṃ asakkhiṃsu. Tasmā ayaṃ therī

Bhaddākaccānāti tassā nāmaṃ. Bhaddakaccanassa viya hi uttamasuvaṇṇassa viya ca tassā sarīravaṇṇo ahosi, tasmā bhaddākaccānātveva saṅkhaṃ gatā. Rāhulamātāyetaṃ adhivacanaṃ.

Sāpi padumuttarabuddhakāle haṃsavatiyaṃ kulagehe paṭisandhiṃ gahetvā aparabhāge satthu dhammakathaṃ suṇantī satthāraṃ ekaṃ bhikkhuniṃ mahābhiññāppattānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi. Sā kappasatasahassaṃ devamanussesu saṃsaritvā imasmiṃ buddhuppāde suppabuddhassa gehe paṭisandhiṃ gaṇhi, bhaddākaccānātissā nāmaṃ akaṃsu.