Satthāpi kho tassa cittaṃ ñatvā bhikkhusaṃghaparivuto nivesanadvāreyeva pāturahosi. So "satthā āgato"ti sutvā ativiya ussāhajāto dasabalassa santikaṃ gantvā pañcapatiṭṭhitena vanditvā satthu pattaṃ paṭiggahetvā gharaṃ pavesetvā paññattavara- buddhāsane satthāraṃ, avasesaāsanesu ca bhikkhusaṃghaṃ nisīdāpetvā buddhappamukhaṃ bhikkhusaṃghaṃ nānaggarasehi parivisitvā bhattakiccapariyosāne ekamantaṃ nisīditvā evamāha "sammukhā metaṃ bhante bhagavato sutaṃ sammukhā paṭiggahitaṃ nāma `manāpadāyī labhate manāpan'ti. Yaṃ yaṃ bhante mayhaṃ manāpaṃ, taṃ taṃ mayā buddhappamukhassa bhikkhusaṃghassa dinnamevā"ti satthāraṃ pajānāpetvā tato paṭṭhāya yaṃ yaṃ tassa manāpaṃ, taṃ taṃ buddhappamukhassa bhikkhusaṃghassa deti. Taṃ pana sabbaṃ pañcakanipāte uggasutte vitthārato āgamissatīti. Evametaṃ vatthu samuṭṭhitaṃ. Satthā aparabhāge jetavane viharanto taṃ upāsakaṃ manāpadāyakānaṃ aggaṭṭhāne ṭhapesīti.
Uggatagahapativatthu
[254] Sattame saṃghupaṭṭhākānanti bhikkhusaṃghassa upaṭṭhākānaṃ hatthigāmako uggato gahapati aggoti dasseti. Sopi kira padumuttarabuddhakāle haṃsavatiyaṃ kulagehe nibbatto aparabhāge satthu dhammadesanaṃ sutvā satthāraṃ ekaṃ upāsakaṃ saṃghupaṭṭhākānaṃ aggaṭṭhāne ṭhapentaṃ disvā adhikārakammaṃ katvā taṃ ṭhānantaraṃ paṭṭhesi. So kappasatasahassaṃ devamanussesu saṃsaritvā imasmiṃ buddhuppāde hatthigāme seṭṭhikule nibbatti, uggatakumārotissa nāmaṃ akaṃsu.