So aparabhāge vayappatto gharāvāse patiṭṭhāya aññatitthiyānaṃ upaṭṭhāko hutvā carati. Atha satthā paccūsasamaye lokaṃ volokento tassa sotāpattimaggahetuṃ disvā bhikkhācāravelāya nivesanadvāraṃ agamāsi. So dasabalaṃ disvā cintesi "samaṇo gotamo mahākule ceva jāto, loke ca atipaññāto, tenassa santikaṃ agamanaṃ nāma na yuttan"ti. So satthu santikaṃ gantvā pādesu vanditvā pattaṃ gahetvā gharaṃ pavesetvā mahārahe pallaṅke nisīdāpetvā bhikkhaṃ datvā bhattakiccapariyosāne ekamantaṃ nisīdi. Satthā tassa cariyavasena dhammaṃ desesi. Desanāpariyosāne sotāpattiphale patiṭṭhahi. Satthāpi taṃ dametvā vihārameva gato.
Tato māro cintesi "ayaṃ sūrambaṭṭho nāma amhākaṃ santako, satthā panassa ajja gehaṃ gato, kiṃ nu kho satthu dhammaṃ sutvā maggapātubhāvaṃ akaritthāti yāvassa mama visayā atikkantabhāvaṃ vā anatikkantabhāvaṃ vā jānāmī"ti attano kāmarūpitāya dasabalassa sarikkhakaṃ rūpaṃ māpetvā cīvaragahaṇaṃpi pattagahaṇaṃpi buddhākappeneva gantvā dvattiṃsalakkhaṇadharo hutvā sūrambaṭṭhassa gehadvāre aṭṭhāsi. Sūrambaṭṭhopi "puna dasabalo āgato"ti sutvā "buddhānaṃ aniyyānikagamanaṃ nāma natthi, kena nu kho kāraṇena āgato"ti vegena "dasabalo"ti saññāya tassa santikaṃ gantvā abhivādetvā ekamantaṃ ṭhito "bhante tumhe idāneva imasmiṃ gehe bhattakiccaṃ katvā gatā, kiṃ nu kho kāraṇaṃ paṭicca puna āgatatthā"ti āha. "sūrambaṭṭha mayā dhammaṃ kathentena ekaṃ anupadhāretvā kathitaṃ atthi, mayā hi pañcakkhandhā `sabbeva aniccā dukkhā anattā'ti kathitā, na pana te sabbeva evarūpā. Ekacce hi khandhā niccā dhuvā sassatā atthī"ti āha.
Tato sūrambaṭṭho cintesi "ayaṃ kathā ativiya bhāriyā. Buddhānañhi dvekathā nāma natthīti upadhāritvā dasabalassa māro nāma paṭipakkho, addhā ayaṃ māro bhavissatī"ti cintetvā "mārosi tvan"ti āha. Ariyasāvakena kathitakathā tassa pharasuppahāro viya ahosi, tasmā sakabhāvena saṇṭhāretuṃ asakkonto "āma sūrambaṭṭha ahaṃ māro"ti āha. "tādisānaṃ mārānaṃ sataṃpi sahassaṃpi āgantvā mama saddhaṃ cāletuṃ na sakkonti, mahāgotamo dasabalo mayhaṃ dhammaṃ desento `sabbe saṅkhārā aniccā'ti bodhetvā desesi, mā me gharadvāre tiṭṭhā"ti accharaṃ pahari. Māro tassa vacanaṃ sutvā paṭicaritvā kathetuṃ asakkonto tatthevantaradhāyi. Sūrambaṭṭhopi sāyaṇhasamaye satthu santikaṃ gantvā mārena katakiriyaṃ kathetvā "bhante evaṃ māro mama saddhaṃ cāletuṃ vāyamitthā"ti āha. Satthā tadeva kāraṇaṃ atthuppattiṃ katvā imasmiṃ sāsane sūrambaṭṭhaṃ aveccappasannānaṃ aggaṭṭhāne ṭhapesīti.