dhammadinnā mahāmāyā visākhā cāpi sattamīti evaṃnāmā hutvā nibbattā. Tatrāyaṃ saṃghadāsī ekaṃ buddhantaraṃ devamanussesu saṃsaritvā imasmiṃ buddhuppāde aṅgaraṭṭhe bhaddiyanagare meṇḍakaseṭṭhiputtassa dhanañjayassa

@3 cha.Ma.,i. 4 Sī. sattimāti Seṭṭhino aggamahesiyā sumanadeviyā nāma kucchismiṃ nibbatti, visākhātissā nāmaṃ akaṃsu. Tassā sattavassikakāle dasabalo selabrāhmaṇassa ca aññesañca bodhaneyyabandhavānaṃ upanissayasampattiṃ disvā mahābhikkhusaṃghaparivāro cārikaṃ caramāno tasmiṃ raṭṭhe taṃ nagaraṃ pāpuṇi.

Tasmiṃ ca samaye meṇḍako gahapati tasmiṃ nagare pañcannaṃ mahāpuññānaṃ jeṭṭhako hutvā seṭṭhiṭṭhānaṃ kāresi. Pañca mahāpuññā nāma meṇḍako seṭṭhī, candapadumā nāma tasseva aggamahesī, tassa ca putto dhanañjayo nāma tassa bhariyā sumanadevī nāma, meṇḍakaseṭṭhissa dāso puṇṇo nāmāti. Na kevalañca meṇḍakaseṭṭhīyeva, bimbisāramahārājassa pana āṇāpavattiṭṭhāne pañca amitabhogā nāma ahesuṃ jotiko jaṭilo meṇḍako puṇṇo kākabaliyoti. Tesu ayaṃ meṇḍakaseṭṭhī dasabalassa attano nagaraṃ sampattabhāvaṃ sutvā puttassa dhanañjayaseṭṭhino dhītaraṃ visākhaṃ dārikaṃ pakkositvā evamāha "amma tuyhaṃpi maṅgalaṃ amhākaṃpi maṅgalaṃ, tava parivārikehi pañcahi dārikāsatehi saddhiṃ pañca sakaṭasatāni āruyha pañcahi dāsisatehi parivutā dasabalassa paccuggamanaṃ karohī"ti. Sā pitāmahassa vacanaṃ sutvā tathā akāsi. Kāraṇākāraṇesu pana kusalattā yāvatikā yānassa bhūmi, yānena gantvā yānā paccorohitvā pattikāva satthāraṃ upasaṅkamitvā vanditvā ekamantaṃ aṭṭhāsi. Athassā cariyavasena satthā dhammaṃ desesi. Desanāpariyosāne pañcahi dārikāsatehi saddhiṃ sotāpattiphale patiṭṭhāsi. Meṇḍakaseṭṭhīpi kho satthu santikaṃ gantvā satthāraṃ vanditvā ekamantaṃ nisīdi, atha satthā tassapi cariyavasena dhammaṃ desesi. So desanāpariyosāne sotāpattiphale patiṭṭhāya satthāraṃ svātanāya nimantetvā punadivase attano nivesane paṇītena khādanīyena bhojanīyena buddhappamukhaṃ bhikkhusaṃghaṃ parivisitvā etenupāyena aḍḍhamāsaṃ mahādānaṃ adāsi. Satthā bhaddiyanagare yathābhirantaṃ viharitvā pakkāmi.