Ito paraṃ aññaṃ kathāmaggaṃ vissajjetvā visākhāya uppattikathāva kathetabbā. Sāvatthiyañhi kosalarājā bimbisārassa santikaṃ pesesi "mama āṇāpavattiṭṭhāne amitabhogavindanakulaṃ nāma natthi, tumhākaṃ amitabhogavindanakulaṃ nāma atthi, amhākaṃ amitabhogavindanakulaṃ pesetū"ti. Rājā amaccehi saddhiṃ mantesi. Amaccā "mahākulaṃ pesetuṃ na sakkā, ekaṃ pana seṭṭhiputtaṃ pesemā"ti meṇḍakaseṭṭhino puttaṃ dhanañjayaseṭṭhiṃ āyācayiṃsu. Rājā tesaṃ vacanaṃ sutvā taṃ pesesi. Atha naṃ kosalarājā sāvatthito sattayojanamatthake sāketanagare seṭṭhiṭṭhānaṃ datvā vāsesi.

Sāvatthiyañca migāraseṭṭhino putto puṇṇavaḍḍhanakumāro nāma vayappatto ahosi. Athassa pitā "putto me vayappatto, gharāvāsenassa ābandhanasamayo"ti ñatvā "amhākaṃ samānajātike kule dārikaṃ pariyesathā"ti kāraṇākāraṇakusale purise pesesi. Te sāvatthiyaṃ attano rucitaṃ adisvā sāketaṃ agamaṃsu. Taṃdivasañca visākhā attano samānavayehi pañcahi kumārikāsatehi parivāritā nakkhattakīḷanatthāya ekaṃ mahāvāpiṃ agamāsi. Tepi purisā antonagaraṃ caritvā attano rucitaṃ dārikaṃ adisvā bahinagaradvāre aṭṭhaṃsu. Tasmiṃ samaye devo vassituṃ ārabhi. Atha tā visākhāya saddhiṃ nikkhantā dārikā temanabhayena vegena sālaṃ pavisiṃsu. Te purisā tāsaṃpi antare yathārucitaṃ dārikaṃ na passiṃsu. Tāsaṃ pana sabbapacchato visākhā devaṃ vassantaṃpi agaṇetvā aturitagamanena temayamānāva sālaṃ pāvisi. Te purisā taṃ disvā cintayiṃsu "rūpavatī tāva aññāpi etaparamā bhaveyya, rūpaṃ panetaṃ ekaccāya kārikaṃ cakkaṃ viya hoti, kathaṃ samuṭṭhāpetvā kathentā jānissāma madhuravacanā vā no vā"ti. Tato naṃ āhaṃsu "ativipariṇatavayaitthīvaṇṇā viyasi ammā"ti. Kiṃ disvā kathetha tātāti. Aññā tayā saddhiṃ kīḷanakumāriyo temanabhayena vegena āgantvā sālaṃ paviṭṭhā, tvaṃ pana mahallikā viya padavāraṃ anatikkamma āgacchasi,